Proxecto Neo 413.13 Nicolás Veiga; Catalina Caamaño e María Méndez; Ramón Casas, Compañía de teatro Ollomao.

 

No programa 413 conversamos con Nicolás Veiga, en representación da Asociación Guillém Veiga Iglesias, que traballa para a detección precoz de trastornos de crecemento na etapa infantil.

De saúde continuamos falando tamén nos seguintes minutos. Desta vez con Catalina Caamaño e con María Méndez, do Centro de Saúde de Burela. Con Catalina Caamaño, farmacéutica; e con María Méndez, enfermeira, falamos da PAUSA ACTIVA POLA SAÚDE que se realiza todos os días durante cinco minutos, entre as 12 e as 12:05. O lugar da cita é na praza do Concello de Burela e a convocatoria está incluída na ESTRATEXIA DE PROMOCIÓN DA SAÚDE organizada polo Centro de Saúde e o Concello de Burela e o Ministerio de Sanidade.

Nos minutos finais estivo con nós David Baltar, estudante de 4º de ESO, que nos falou sobre a oferta educativa para aprender a xogar ao xadrez.

Proxecto Neo 412.13: Sara, Lía e Sabela (IES de Beade); Silvia Iglesias (IES de Beade) e Suso de Toro

Esta semana abrimos o programa 412 cunha nova colaboración de Sara, Lía e Sabela, estudantes do Instituto de Beade, en Vigo.
Mais unha vez, esta colaboración chegounos grazas ás xestións da profesora Silvia Iglesias. Con ela tamén falamos.
Na segunda parte do programa conversamos co escritor Suso de Toro.
Con el fixemos un repaso da súa traxectoria lingüística para acabarmos coñecendo a súa etapa de neofalante que o levou a facerse escritor na nosa lingua común.

Ibrahima Djanban, Izan G. Maseda e Iago Rodríguez, protagonistas do programa 412. Na foto aparecen con Karina Parga e Vanessa Vila-Verde.

Proxecto Neo 411.13: Antía Yáñez; Daniela Domingos Lopes

No programa 411 conversamos coa escritora Antía Yáñez, que dirixiu en Burela un obradoiro de creación literaria. Esta actividade estivo encadrada dentro da conmemoración do 8 de marzo, o Día Internacional da Muller.

Na segunda parte do programa estivo con nós Daniela Domingos Lopes, xogadora do Burela F.S. Con ela falamos sobre outra celebración reivindicativa: a da sensibilización contra a homofobia no deporte.

 

 

Proxecto Neo 410.13: Ana Polanco (IES Monte das Moas); Sara, Lía e Sabela (IES de Beade); Joana e Sara (IES Xoán Montes); Celia Bispo.

Esta semana comezamos o programa 410 coa colaboración de Ana Polanco, alumna do IES Monte das Moas. Da cidade da Coruña viaxamos á cidade de Vigo para ouvirmos as nosascolaboradoras Sara, Lía e Sabela, estudantes no Instituto de Beade.

As nosas seguintes convidadas participaron desde a cidade de Lugo: chámanse Joana e Sara. Ambas estudan 1º de ESO no Instituto Xoán Montes.

A protagonista central do programa foi Celia Bispo, unha muller de 96 anos, nacida no ano 1928. Ela foi entrevistada por Vreixo Cao, nacido no ano 2015, o integrante mais novo da masa coral Proxecto Neo.

Proxecto Neo 409.13: Aqui tamén se fala (IES Monte das Moas); Cristian F. Caruncho; Jesús San José Arranz; Uxío Rego.

Abrimos o programa cunha nova colaboración que nos enviaron desde o Instituto Monte das Moas, da Coruña. Neste caso, a colaboración dunha alumna: Sofía Calderón.
Despois da música, conversamos cun artista de Banda Deseñada: Cristian Caruncho, que nos presentou Saínza, a punkiereteira e que nos falou sobre un obradoiro a realizar no Instituto Perdouro.
O noso seguinte convidado foi outro artista: o pintor Jesús San José Arranz, que esta semana inaugura exposición.
Contra o final do programa, o protagonista foi Uxío Rego, estudante do Mestrado de Educación na Universidade da Coruña. Uxío está neste momento realizando as prácticas docentes como profesor de Tecnoloxia, orientado por Natalia Irímia, colaboradora do noso programa.

 

Imaxe da entrevista de Nicolás Amorín a Jesús San José Arranz

 

Proxecto Neo 408.13: IES Monte das Moas; Grupo de Participación Adolescente; Leticia Maseda e Edzana Semedo (IES de FOZ); Pedro Souto (IES nº 1- A Estrada)

 

Abrimos o programa 408 co AQUÍ TAMÉN SE FALA. Foi unha colaboración do Instituto Monte das Moas da Coruña.

Despois da primeira música, Mateo Corral e María Puente faláronnos do Grupo de Participación Adolescente de Burela.

Leticia Maseda, directora do Instituto de Foz, presentounos un encontro gastronómico internacional (MENU COM SABOR PORTUGUÊS) e introduciu a entrevista cunha das alumnas do Ciclo Superior de Hotelaría (polo sistema dual). Con Edzana Semedo Lopes conversamos demoradamente sobre a súa traxectoria vital, a formación académica e a experiencia no Grupo Paradores.

Finalizamos a emisión cunha conversa co Xeneral Pedro Souto, que nos falou sobre o ENTROIDO DO ULLA. 

Proxecto Neo 407.13: Yeray Díaz; Iago Rodríguez; Sara Pico (IES Muralla Romana); Brais Pedreira Taboada

 

 

Iniciamos o programa 407 cunha das colaboracións do Aquí TAMÉN SE FALA: desta vez foi unha crónica que nos chegou de Vigo. Concretamente do Instituto Santa Irene.
A primeira das músicas serviu para abrir a porta a dúas novas voces no noso programa: as de Yeray Díaz e Iago Rodríguez, que xa levan unhas semanas connosco, en cualidade de observadores.
A seguir, Sara Pico, alumna do Instituto Muralla Romana de Lugo, falounos do Concurso Lucus Intercentros, que se celebrou durante este mes de xaneiro.
Em Proxecto Neo tamén falamos hoxe de estudos de HOSTELARIA. Foi unha colaboración do Instituto de Foz, que prepara un singular encontro gastronómico a celebrar no próximo día 8 de febreiro.
Finalizamos a emisión cunha conversa sobre ATENCIÓN Á DIVERSIDADE educativa. Neste caso o noso experto foi o profesor BRAIS PEDREIRA TABOADA.