Proxecto Neo: o programa radiofónico que dá voz á comunidade neofalante

Proxecto Neo, o programa de diálogo intercultural, está en antena todos os mércores entre as 5 e as 6 da tarde. Pode acompañarnos desde calquera lugar do mundo a través da radio á carta.

22/12/22

Proxecto Neo, 370.12: María Fuente (árbitra); Chelo Gundín (especialista en bibliotecas escolares)




María Fuente, a primeira árbitra de fútbol da Mariña


Primeiro temos unha conversa sobre deporte feminino. A primeira entrevista está protagonizada por María Fuente, que comeza a dar os primeiros pasos na arbitraxe.
Na segunda parte do programa a protagonista é a profesora Chelo Gundín, dinamizadora das bibliotecas escolares. Con ela falamos sobre animación á lectura e tamén sobre a didáctica da Lingua e a Literatura.

15/12/22

Proxecto Neo, 369.12: María Quintana; François Davo; Daniel Domínguez


    Equipa de realización do programa nº 369. Na primeira fila: Hugo García; María Quintana; Sara Villarquide. De pé: Carme         Gallo e Germán Quintana.

No programa 369 recibimos a incorporación de María Quintana, unha estudante de só 9 anos. Con ela conversamos un nomento.O noso seguinte convidado foi o profesor, tradutor e escritor François Davo. Nacido en Le Mans, chegou á cidade da Coruña como profesor auxiliar de Lingua Francesa no decenio de 1990.
Daniel Domínguez, o guionista de O Corpo aberto -a longametraxe de Ángeles Huerta-, que nos falou sobre a súa profesión e tamén sobre esta historia arraiana ambientada en Lobosandaus.


08/12/22

Proxecto Neo, 368.12: Gaspar Broullón ("Corpo aberto"); Irene Pérez Lis ("Surfeando libros")





Gaspar Broullón é profesor da materia de Produción Audiovisual na Universidade de Santiago de Compostela. Nuria Ramos Cuba solicitoulle entrevista para falaren sobre produción cinematográfica e xuntos prepararon unha intervención didáctica sobre o Corpo Aberto, de Ángeles Huerta, inspirada no "Lobosandaus" arraiano de Xosé Luís Méndez Ferrín.

Con este prato central parecía que non habería sitio para outro tanto. E claro que había. Aínda faltaba a conversa con Irene Pérez Lis, do Instituto Eusebio da Guarda. Con ela estivemos Surfeando Libros. Así con maiúscula.


Porta de entrada a Corpo Aberto, o filme de Ángeles Huerta en que
Gaspar Broullón se ocupou da produción.

                                        Entrevista con Irene Pérez Lis, a surfeadora de libros.
                                        Esta iniciativa do IES do Ribeiro contou coa colaboración
de Rubén Riós.

30/11/22

Proxecto Neo, 367.12: Paula Jorge Horta (Land Rober); Djennifer de Brito Semedo; Álvaro Díaz (Asoc. Tempo Novo - Elviña)




Paula Jorge Horta retornou ao Instituto Perdouro. Desta vez para falar de Educación inclusiva. De guiar a conversa ocupáronse Carme Gallo, Sara Villarquide e Hugo F. Galdo.
Unha das salas de aulas do instituto converteuse momentaneamente nun estudio radiofónico-audiovisual (Matías Nicieza gravou a sesión completa). O alumnado puido presenciar ao vivo a realización e tivo un excelente comportamento).
A protagonista da segunda parte foi a estudante Djennifer de Brito Semedo, que nos falou da súa participación no grupo musical Batuko Tabanka. Unha intervención colosal!
O terceiro protagonista foi Álvaro Díaz, profesor de Lingua Inglesa e parente de Ricardo Carvalho Calero. Un neofalante do século do século XX e outro do século XXI.
Brillante!
Paula no momento da entrada ao instituto. Mauro, Yuri, Íker, Ian, Patrick e Rubén non perderon a oportunidade de saudala e de tirar unha fotografía con ela.


24/11/22

Proxecto Neo, 366.12: Lúa Mariña Fernández; Jhonny F. Taboada; Oliva Sanluis Tejada


Abrimos o programa coa recomendación literaria feita polo profesor Manolo Carreira. Xusto despois escoitamos outra peza radiofónica que nos enviou o alumnado de Ciencias da Terra e do Medio Ambiente.Desde A Estrada atendeu a nosa chamada a estudante Lúa Mariña Fernández, que nos falou dunha curiosa iniciativa surxida no IES Lousada Diéguez: o Samaín Creativo.
Do mesmo tema faláronnos Nuria Ramos Cuba e Jhonny F. Taboada.
Na parte final do programa conversamos con Oliva Sanluis Tejada, Orientadora do Instituto de Leixa (Ferrol).



16/11/22

Proxecto Neo, 365.12: Lourenço Gomes e Élter Carlos (UNIV. CABO VERDE); Dulce Fernández Graña (IES Eusebio da GUARDA)


Dous profesores e unha profesora de Cabo Verde estiveron durante dúas intensas xornadas en Burela. Primeiro visitaron o IES Monte Castelo, despois foron recibidos no Concello e, finalmente, estiveron coa comunidade educativa do IES Perdouro.Neste programa falamos cunha representación dos estudantes e do profesorado e, mais tarde, falamos tamén cos propios docentes convidados.
Na parte final do programa, conversamos con Dulce Fernández Graña, Catedrática de Lingua e Literatura Galegas no Instituto Eusebio da Guarda, da Coruña.




09/11/22

Proxecto Neo, 364.12: Nuria Bouza; Moustapha Sarr



Abren o programa Paula López e David Otero cunha entrevista coa luguesa Nuria Bouza, xogadora e directora deportiva de Voleibol que traballa actualmente en Cataluña.

A entrevista está enmarcada dentro do Proxecta que leva por título "365 días de respecto e igualdade".
Xa na parte final do programa, conversamos con Moustaphá Sarr, estudante do 2º curso de ESO.


03/11/22

Proxecto Neo, 363.12: Germán Quintana Sanjurjo; Cristian G. Mesa; Laura G. Santiso



Proxecto Neo tivo a honra de abrir as portas da radiodifusión a un músico de 12 anos: Germán Quintana Sanjurjo. Primeiro propiciamos a audición da súa música e despois falamos demoradamente con el.
O seguinte convidado foi Cristian Gómez Mesa, integrante da Masa Coral Modelo Burela desde hai case dez anos. Estivo con nós con motivo da súa participación no Enreguéifate, unha iniciativa en que participa como docente.
A entrevista central do programa estivo protagonizada por Laura García Santiso, deseñadora de lápidas, con obra nos cemiterios de Burela e toda a súa área de influencia.



27/10/22

Proxecto Neo, 362.12: Breogán F. Bouza; David L. Casas; Hugo F. Galdo; Amancio Liñares



Celebramos a incorporación de tres novas voces a Proxecto Neo. Trátase dos alumnos Breogán F. Bouza, David L. Casas e Hugo F. Galdo, os tres estudantes de 1º de ESO. Despois de recibilos no estudio, dedicámoslles unha canción do Grande Amore.
As entrevistas con estes mozos de entre 12 e 13 anos, Alba e Nerea conversaron co profesor Amancio Liñares, que falou sobre Ramón Piñeiro e que nos convidou a asistir a un ciclo de conferencias a celebrar durante todo o mes de novembro, todas elas centradas no prestixioso intelectual de Láncara e director da Editorial Galaxia.



20/10/22

Proxecto Neo, 361.12: Benjamim Outeiro ("O Brasileiro da Pedra")

 


Por xentileza de Rocío Candales e Séchu Sende, nesta emisión de Proxecto Neo recollemos unha conversa co escritor galego-brasileiro Benjamim Outeiro, orixinario do lugar da Pedra de Nemenzo (Santiago de Compostela).

Coa voz narradora de Nuria Ramos Cuba, minuto a minuto coñecemos o periplo vital dun galego de oitenta e nove anos que cruzou o Atlántico por primeira vez en 1951 a bordo dun barco arxentino.

05/10/22

Proxecto Neo, 360.12: Víctor F. Freixanes; Abrahám Rivera


Despois de que Carmen Castro nos fixese a Recomendación Literaria da semana, os "Aires de Pontevedra" na versión de Milladoiro abriron o camiño para que Nuria Ramos Cuba converse demoradamente co Presidente da Academia Galega. A estudante de Burela comezou a entrevista facendo unha alusión a dúas localidades que teñen o mesmo nome, cunha simple alteración gráfica: Borela (con -o-) e Burela (con -u); e coa resposta a esta pregunta o profesor mostrounos un ton tan próximo que conseguía cautivar a audiencia.
Na segunda parte do programa, o protagonismo centrouse no viveirés Abrahám Rivera, de Viveiro, colaborador nun curso de Artes Marciais a celebrar en San Cibrao nos próximos días 15 e 16 de outubro.



28/09/22

Proxecto Neo, 359.12: Xoán Moreda Pinto; Vanesa Vila-Verde Lamas

 


A segunda promoción do CUALE -para a obtención do título internacional B1- xa está en camiño. No acto de inauguración participou Xoán Moreda Pinto, profesor de Filosofía, que o curso pasado realizou estudos de Lingua Portuguesa na Escola Oficial de Idiomas de Lugo.

Foi precisamente o profesor Moreda Pinto o protagonista da nosa primeira entrevista. Con el falamos de trinta anos de docencia no ensino público e mesmo do sector da hotelaría, antes de nos centrarmos na súa volta aos estudos regrados como alumno (na EOI).
A segunda entrevista estivo dedicada á incorporación da profesora Vanesa Vila-Verde Lamas ao IES Perdouro e á iniciativa educativa Modelo Burela.



22/09/22

Proxecto Neo, 358.12: Mónica Alonso



Abrimos o programa coa intervención do profesor Fernando Losada, autor dunha peza sonora sobre erros ortográficos comúns en letreiros urbanos protagonizada por estudantes de 3º de ESO (PMAR), coa orientación de Sonia Rey, a súa profesora do Ámbito Lingüístico e Social. A seguir, o noso contertulio presentounos nova colaboración para o curso 22-23: un espazo de animación á lectura.

O contido central do programa estivo dedicado Mónica Alonso. Esta profesora de Educación Física no IES Perdouro evocou para nós a etapa en que combinou os estudos no INEF en Bastiagueiro coa colaboración en CUAC FM (tanto na asociación comunitaria como na realización de programas radiofónicos). Con ela tamén falamos dos seus traballos na cadea 40 Principales e en RadioVoz. Finalmente, gardamos uns minutos para falar sobre o ensino da Educación Física nos centros escolares.
O grupo de participantes no patio da Casa da Xuventude pouco despois de finalizar o programa e antes de participar na sesión de caricias aos cabalos do prado contiguo. A foto é de Lucía Rivas.



14/09/22

Proxecto Neo, 357.12: Programa especial dedicado a Bernardo Penabade

 


No comezo do curso académico 2022-23 chegamos ás 357 semanas en antena. Nuria Ramos e Cristian Gómez redactaron e ocupáronse da realización dun programa monográfico ao profesor Bernardo Penabade. Entre outras persoas, interviron Manolo Maseda, Sechu Sende, Maribel Crecente, Aitor López Anello, Xián Liñares, Maca Ledo, Simón R. Rouco, Helena Valle, Senín Díaz, etc.

23/06/22

Proxecto Neo, 356.11: Miguel Sande; Amancio Liñares


O xornalista Miguel Sande, delegado da Voz de Galicia na Mariña, atendeu a nosa chamada e falou con Nuria Ramos Cuba sobre a súa obra de creación literaria. Aproveitamos para facer a presentación dun libro de recente publicación: O Negociador.
Con Amancio Liñares aproveitamos para evocar a figura de Avelino Pousa Antelo, xusto no momento en que se están facendo as primeiras presentacións dun novo libro: As paroladas de Avelino Pousa Antelo na Radio Galega.

16/06/22

Proxecto Neo, 355.11: Samuel Silva; Ramón Real; Henrique Sanfiz


No programa 351 contamos coa participación de Samuel Silva, xornalista do Público. Falounos da súa experiencia formativa no Centro de EStudos Galegos da Universidade do Minho, baixo a dirección educativa do profesor Alberto PAz Félix.


Co estudante Ramón REal falamos da Feira da Ciencia organizada polo Instituto PErdouro.
Nos minutos finais acompañounos Henrique Sanfiz, Director de Radio Fene e da Cadea de Emisoras Municipais Radiofusión.

entrevistas educación

09/06/22

Proxecto Neo, 354.11: Miguel González Somovilla; Umberto Corral; Pablo García Martín



Abrimos o programa cunha conversa co xornalista Miguel González Somovilla, que nos próximos días 1 e 2 de xullo estará en Mondoñedo para participar no IIº Encontro Cunqueiro.O berciano de Bembibre, Umberto Corral, adiantounos os contidos de Fálame Sempre, un filme do xénero documentario que describe en panorámica a situación da lingua galega naquela comarca.
Nos últimos falamos con Pablo García Martín, alumno de 3º de ESO, estudante no Conservatorio de Música de Viveiro e integrante da Asociación Dambara.

02/06/22

Proxecto Neo, 353.11: Martín Lestao (Asoc. Burela Floral); Shiva Alinda Nurhakim; Carmen Castro Novo; Armando Requeixo

 

Este é o programa das celebracións. Martín Lestao, da Asociación Burela Floral, convidounos a participar nos traballos de preparación da grande alfombra conmemorativa das festas patronais da localidade. Despois falounos dos vínculos entre as localidades galegas que manteñen esta tradición: Perbes, Ares, Ames, Ponteareas... Aínda tivemos tempo para coñecer como lle foi nun encontro internacional celebrado en México.
A protagonista do diálogo intercultural foi Shiva Alinda Nurhakim, estudante de 3º de ESO, con quen festexamos o seu premio no certame #eusonpilabot. A través das súas palabras, soubemos como se desenvolveu a cerimonia de entrega celebrada no Museu Pedagóxico de Galiza; e tamén viaxamos a Muxía, onde Shiva pasou varios anos, ao chegar á nosa terra desde Indonesia.
A profesora Carmen Castro falounos sobre outro certame -o de Educación Financeira, convocado por Abanca-, que foi gañado por un grupo de estudantes de 1º de ESO do Instituto Perdouro.
No cuarto dos contidos, coa colaboración do profesor Armando Requeixo, contribuímos á divulgación do IIº Encontro Álvaro Cunqueiro a celebrar en Mondoñedo durante os días 1 e 2 do próximo mes de xullo.

26/05/22

Proxecto Neo, 352.11: Carme Sampedro Miranda; Íker Trillo e Alberto Méndez (C.B. Burela); Moncho Mariño


Abrimos o programa coa interpretación da cantiga titulada Ondas do Mar de Vigo por alumnos e alumnas de 4º de ESO, dirixidos pola profesora Patricia Inés Fernández Salas. Pola súa parte, a profesora Carme Sampedro Miranda presentounos un Plan Proxecta realizado no Instituto Perdouro.

Trátase do 365 días pola Igualdade.Íker Trillo e Alberto Méndez, do Clube de Baloncesto Burela, faláronnos do Campionato galego desta modalidade deportiva gañado pola entidade da Mariña.
Nos minutos finais, Moncho Mariño falounos do Xornal da Mariña, unha cabeceira asociada ao Galicia Confidencial.

19/05/22

Proxecto Neo, 351.11: Fernando Losada; Leidy Diana Pillaca; Imane Oubella; Claudia Romo Leivas


O Profesor Fernando Losada visitounos no estudio de Radio Burela para facer memoria das colaboracións que nos enviou durante este curso académico.Na segunda parte, o diálogo intercultural tivo como protagonistas as estudantes Leidy Diana Pillaca, con raíces familiares no Perú, e Imane Oubella, orixinaria de Marrocos.
Na terceira parte, Claudia Romo Leivas fíxonos a historia dunha fotografía feita en 1965 durante as festas de Mondoñedo. Xusto despois, tivemos o privilexio de conversar cos protagonistas da histórica imaxe: Marisa Martínez Anello (avoa de Claudia) e José Castro (o Amancio da Canción, vocalista da Orquestra Finisterre).

12/05/22

Proxecto Neo, 350.11: Brais Vila; Bea, a de Estrella; Séchu Sende


Brais Vila fíxonos de cronista especial dunha expedición educativa pola Terra Chá. O grupo de Burela estivo primeiro no castro de Viladonga e despois desprazouse á lagoa de Cospeito, antes de gozar dun momento de lecer na área recreativa da Madalena, en Vilalba.A seguir conversamos con Bea, a de Estrella, que acaba de editar o seu primeiro disco. Nós conversamos con ela e coñecemos os contidos deste novo produto da cultura musical galega.
Na terceira das entrevistas falamos con Séchu Sende, con motivo da publicación de O povo improvisador. Aventuras sobre regueifa e poesía oral.



05/05/22

Proxecto Neo, 349.11: Yorel Ladra (aVozdasLetras); Branca Trigo; Adrián Maceda; Antonio Reigosa

 




Unha conversa con Yorel Ladra Ballesteros, da Voz das Letras2022, presentounos a iniciativa de traballo colaborativo para tributar homenaxe a Florencio Delgado Gurriarán.
Despois dunha magnífica mostra de aprendizaxe-servizo, entramos nunha serie de contidos dedicados ao encontro Mondoñedo é poesía e ao certame Díaz Jácome. Atenderon a nosa chamada Branca Trigo, Adrián Maceda e Antonio Reigosa.

28/04/22

Proxecto Neo, 348.11: Día do libro; Fran Bouso (Mondoñedo é!); Erín Agustí; Xulio Pardo de Neira


Celebramos o Día do Libro cunha colaboración que nos chegou desde o Colexio dos Castros, en Burela. Inmediatamente despois, viaxamos á capital da Mariña para coñecermos o programa da xornada Mondoñedo é Poesía. Fran Bouso encargouse de facer un percorrido por esta iniciativa de dinamización cultural e convidounos a asistir á presente edición a celebrar o domingo, día 1 de maio.Durante uns minutos, coñecemos a nosa nova colaboradora Erín Agustí López, alumna do Instituto Monte Castelo.
O programa finalizouc unha entrevista ao escritor e pedagogo Xulio Pardo de Neira, que nos animou á lectura de tres dos seus últimos libros publicados.

20/04/22

Proxecto Neo, 347.11: Juan Farroñán Villalba; Lucía Gómez Álvarez; Santiago Raimundi; Borxa Freiría; Arián Quinteiro


Abrimos a celebración das Letras Galegas na honra de Florencio Delgado Gurriarán. Neste programa participan os estudantes Juan Farroñán Villalba e Yorel Ladra Ballesteros; a profesora Lucía Gómez Álvarez, autora de Florencio Manuel Delgado Gurriarán. Un legado infindo (Ed. Galaxia); e tres representantes de Kaito Studio, a produtora audiovisual que está en proceso de gravación da peza documental que leva por título #Gurriarán.


Foto de grupono exterior da Casa da Xuventude. A masa coral Modelo Burela está acompañada polos integrantes do equipo de gravación de Kaito Studio, que se desprazaron á Mariña para preparar un traballo audiovisual sobre a celebración das Letras Galegas 



















06/04/22

Proxecto Neo, 346.11: Marcos Abalde e Belén Roca Fortúnez (IES Concepción Arenal); María Álvares Rei (Novas da Galiza)

 

Se na semana pasada facíamos homenaxe á pedagoga Antía Cal e a intervención educativa Ponte nas Ondas, nesta semana retomamos a información sobre o Desafío Galego, organizado no Instituto Concepción Arenal (Ferrol). Xunto coas entrevistas a Marcos Abalde e Belén Roca Fortúnez, docentes, tamén conversamos coa xornalista María Álvares Rei, do Novas da Galiza. A través das súas palabras coñecemos Outonía, unha magnífica aposta polo desenvolvemento sustentável do rural.

31/03/22

Proxecto Neo, 345.11: Carla Trillo (atleta); María Barcala (Teatro do Atlántico); Rubén Figueroa (Ponte nas Ondas)





Inicialmente, conversamos coa atleta Carla Trillo, unha brillante referencia do deporte na Mariña. Coñecemos a súa evolución, o sistema de preparación e incluso falamos de dietas e de deporte escolar.María Barcala convidounos a revisitar vida e obra poética de Rosalía de Castro, a través do espectáculo Libre como os paxaros.
Pola súa parte, Rubén Figueroa -profesor no IES Pedras Rubas, de Salceda de Caselas- falounos da súa experiencia na Ponte nas Ondas, entidade que celebra o seu 27º aniversario.

23/03/22

Proxecto Neo, 344.11: Luis Ríos; Lin Vizoso; Noé F. Quelle




Luis Ríos é un estudante de Formación Profesional. Agora mesmo está próximo a finalizar o Ciclo de Xestión Administrativa e disponse a realizar a Formación en Centros de Traballo en Potenza (Italia) grazas ao programa Erasmus. Nós conversamos con el.
Lin Vizoso estuda Bacharelato. A súa excelente nota media permítelle ser aspirante a unha Beca Europa. Proxecto Neo falou con ela e deu a coñecer á súa audiencia o seu perfil humano.
Pola súa parte, Noé Fernández Quelle pon fin a unha etapa de sete anos consecutivos participando de maneira presencial no noso programa. Agora tamén finaliza os estudos e continuará sendo colaborador desde a distancia.

16/03/22

Proxecto Neo, 343.11: Emilio Insua; Especial #DesafíoGalego



O profesor Emilio Insua avanzounos os contidos do seu novo libro de ensaio, dedicado ao poeta viveirés Luís Sipos Magniac (1845-1879) e anunciounos a presentación a celebrar en Viveiro ás 8 da tarde do día 19 de marzo.

O contido central deste episodio está dedicado á intervención educativa #DesafioGalego, realizada na cidade de Ferrol pola comunidade educativa do Instituto Concepción Arenal. Segundo a entidade organizadora, participaron na actividade 140 alumnos de primeiro e 83 de segundo de bacharelato. Comprometéronse a cumprir obxectivos concretos para estenderen o idioma a todos os ámbitos: o escolar, familiar, virtual...». Nós conversamos con Laura Álvarez Chaos, Zahrat Essafae, Hugo Seixas e Carolina Gómez Pita.


09/03/22

Proxecto Neo, 342.11: Óscar Pérez Moronta; Iago Alcántara; Gala Dacosta Diehl



Comezamos cunha colaboración do alumnado da materia de Valores Éticos. Un traballo que nos envía o profesor Fernando Losada.
Inmediatamente despois coñecemos a traxectoria de Óscar Pérez Moronta, alumno de 1º de bacharelato, un auténtico modelo de uso lingüístico aglutinante.
Xusto despois de conversarmos con Óscar Pérez, viaxamos a Santiago de Compostela para coñecermos a iniciativa que leva por título A BOA MEDICINA. O noso interlocutor foi Iago Alcántara, alumno do 6º curso da carreira na Facultade de Medicina e Odontoloxía da USC.
Finalizamos o programa en Barcelona, en conversa coa xornalista Gala da Costa Diehl.

23/02/22

Proxecto Neo, 341.11: Antón Expósito Campo; Paula Alonso (CUAC); Cultura Científica; Paulo G. Ogando (IES J. Carballeira-Bueu)



Antón Expósito Campo, estudante no IES Perdouro, falounos sobre a súa práctica do baloncesto nos equipos de San Cibrao, Viveiro e Lugo; sobre o estudos de frauta e piano na Escola de Música de Burela; e sobre a súa participación no certame Bolsas Europa.

Paula Alonso, de CUAC FM, presentounos Nada que ver, un audiovisual que recolle os 25 anos de funcionamento desta emisora comunitaria. Con ela tamén falamos da presentación deste traballo no decurso dunha gala celebrada no Teatro Colón da Coruña e da participación de CUAC FM nun acto celebrado no Congreso dos Deputados.

Despois de escoitarmos unha nova emisión da sección de Cultura Científica, fixemos a presentación dos Bocados Matemáticos, unha obra de divulgación escrita por Paulo González Ogando publicada por Edicións Xerais.

16/02/22

Proxecto Neo, 340.11: Laura Rodríguez (estudante); Diego de Braelle (cantautor); Diego González Peña (Unidade de Saúde Mental)

 


Laura Rodríguez, alumna do primeiro curso de bacharelato, é unha das máis de 3.000 aspirantes a conseguir unha das 50 bolsas Europa para visitar durante 20 días diversas universidades do continente europeo. Nós falamos con ela.
Na segunda entrevista coñecemos a música do cantautor Diego de Braelle, que acaba de anunciar a inminente aparición do seu primeiro traballo discográfico: Ortegal.
O terceiro dos contidos estivo centrado na saúde mental. Tratámolo co Dr. Diego González Peña, que nos acompañou no estudio.

REFERENCIAS MUSICAIS DE DIEGO DE BRAELLE






09/02/22

Proxecto Neo, 339.11: Xoán Manuel BASTIDA


O Doutor Xoán Manuel Bastida acompañounos no estudio para participar nunha entrevista realizada por Nuria Ramos Cuba, Noé Fernández Quelle e Cristian Gómez Mesa.
Co Dr. Bastida falamos da súa experiencia no estaleiro de Astano, na ría de Ferrol, dos estudos de Medicina na USC e do exercicio profesional como médico.

02/02/22

Proxecto Neo, 338.11: Cultura Científica; Christian Diz (Trasdovento); Uxía C. Souto (IES Bergidum); Arantxa García (HULA)



O Grupo de Cultura Científica do IES Perdouro levounos de viaxe educativa polo Universo. Con ese dinamismo como base, chegamos a Oímbra para falarmos con Christian Diz, da Adega Trasdovento, que produce un viño de nome moi amoroso: Quérote!
A reciprocidade do amor pola nosa cultura abriunos as portas a coñecer unha estudante do Instituto Bergidum Flavium: Uxía Castro Souto.
A última das entrevistas estivo protagonizada pola Dra. Arantxa García Martínez, do Hospital Lucus Augusti, que nos falou da Eutanasia e que nos convidou a asistir en Burela a un acto público para abordar a actualidade dese tema.

26/01/22

Proxecto Neo, 337.11: Fran M. Hidalgo; Luís Álvarez Pousa; Cándido Paniagua


Este é o programa dos Tempos Novos. Dedicámosllo á revista que leva este título con motivo dos seus primeiros 25 anos cumprindo mes a mes coa súa presenza nos quiosques e nas caixas de correos.O primeiro convidado é o profesor Francisco M. Hidalgo, que nos comenta os contidos deste número e que nos dá a súa opinión sobre a nova liña gráfica da publicación.
O director, Luís Álvarez Pousa, atendeu a nosa chamada para felicitalo polos 25 anos ao frente da revista e explicounos os mellores e os peores momentos desta etapa que agora se cerra e presentounos os novos desafíos para o próximo cuarto de século.
Nos minutos finais, o protagonista foi Cándido Paniagua (do IES de Elviña), que nos presentou unha unidade didáctica dedicada ás Tanxugueiras.

19/01/22

Proxecto Neo, 336.11: Cristian Gómez Mesa; Lupe Blanco



Nos primeiros minutos do programa repuxemos a música da serie de animación Doraemon. Co gato cósmico como punto de partida, falamos dos Pitufos, dos Picapedra... e mesmo de Shin Chan.
A seguinte conversa tivo como protagonista o regueifeiro Cristian Gómez Mesa, que participou recentemente no Certame Galego de Regueifa.
A última das entrevistas foi precisamente coa gañadora do citado certame: Lupe Blanco.

12/01/22

Proxecto Neo, 335.11: Pablo Carral (Zintzilik Irratia); Isabel García Millán (Escola Unitaria de Ombre)




Pablo Carral, orixinario de Burela, presentounos o programa Likor Kafé emitido ás ondas a través de Zintzilik Irratia da localidade de Renteria, no País Vasco.
Pola súa parte, a mestra Isabel García Millán falounos da comunidade educativa da escola unitaria da parroquia de Ombre, en Pontedeume.