Proxecto Neo 407.13: Yeray Díaz; Iago Rodríguez; Sara Pico (IES Muralla Romana); Brais Pedreira Taboada

 

 

Iniciamos o programa 407 cunha das colaboracións do Aquí TAMÉN SE FALA: desta vez foi unha crónica que nos chegou de Vigo. Concretamente do Instituto Santa Irene.
A primeira das músicas serviu para abrir a porta a dúas novas voces no noso programa: as de Yeray Díaz e Iago Rodríguez, que xa levan unhas semanas connosco, en cualidade de observadores.
A seguir, Sara Pico, alumna do Instituto Muralla Romana de Lugo, falounos do Concurso Lucus Intercentros, que se celebrou durante este mes de xaneiro.
Em Proxecto Neo tamén falamos hoxe de estudos de HOSTELARIA. Foi unha colaboración do Instituto de Foz, que prepara un singular encontro gastronómico a celebrar no próximo día 8 de febreiro.
Finalizamos a emisión cunha conversa sobre ATENCIÓN Á DIVERSIDADE educativa. Neste caso o noso experto foi o profesor BRAIS PEDREIRA TABOADA.

Proxecto Neo 406.13: Aqui tamén se fala; Érica Gomes Mendes; Brais Tato (IES Nº 1 na Estrada)

Neste programa 406, contamos cunha nova colaboración da Escola dos Castros. O seu gatiño enviounos un novo presente: é unha recomendación literaria moi orixinal. Despois o AQUÍ TAMÉN SE FALA levounos a dous lugares diferentes: Viveiro e a Estrada. Do primeiro tivemos unha colaboración do Instituto María Sarmiento e da Estrada chegounos unha crónica que nos envíaban do Instituto Nº 1.

A entrevista central do programa desta tarde estivo protagonizada pola nosa directora, a profesora Vanessa Vila-Verde, e unha alumna da Universidade de Santiago: Érica Gomes Mendes.

Érica Mendes Tavares estudou no Instituto Perdouro, en Burela; e a súa foi a primeira promoción con título B1 polo sistema CUALE, o programa de Cualificación Lingüística.

Nos minutos finais, atendeu a nosa chamada Brais Tato, un deportista e criador audiovisual que está no final da etapa do Ensino Secundario Obrigatorio.

As protagonistas da conversa central: Vanessa Vila-Verde e Érica Gomes Mendes

Noely Cardoso durante a locución do sumario do programa

Mateo Corral no día da súa reincorporación á locución

Karina Parga e Ibrahima Djamban aos mandos do control técnico

MODELO BURELA ABRE NOVA ETAPA BAIXO A COORDENACIÓN DE VANESSA VILA-VERDE

Coa entrada en 2024, a intervención educativa Modelo Burela iniciou unha nova etapa, que estará coordenada pola profesora Vanessa Vila-Verde, quen se incorporou ao grupo de traballo en setembro de 2022.

Licenciada en Filoloxía Portuguesa pola Universidade de Santiago (USC), Vanessa Vila-Verde Lamas (Pontevedra, 1979) comezou a súa vida laboral no ámbito empresarial dos servizos informáticos. Desde 2007 traballou como tradutora e localizadora de software en Imaxin Software.

En 2015, o ano de entrada na profesión docente, comezou a leccionar nas Escolas Oficiais de Idiomas de Compostela, Montijo (Extremadura), Pontevedra e Lugo. Posteriormente, pasou a ser profesora de Ensino Secundario con destino na EPAPU de Albeiros (Lugo) e no IES Cacheiras en Teo.

Desde o inicio do curso 2022-2023 está no IES Perdouro de Burela, onde se ocupa da docencia da materia de Lingua Portuguesa no Bacharelato, no Programa de Cualificación Lingüística (CUALE) para a preparación dos niveis B1 e B2 e na Atención á Diversidade.

Entre o ano 2009 e 2014 fixo parte de Filmes de Bonaval, un colectivo audiovisual que produciu e realizou diversas filmaxes sobre o noso património lingüístico, nomeadamente en zonas de fronteira. Unha parte destes traballos de campo están recollidas en tres documentarios: Entre Línguas (2010), Em companhia da morte (2012) e A fronteira será escrita (2014).

A nova coordenadora do programa con Sara Villarquide e Carme Gallo durante a 12ª etapa, no curso 2022-2023.

Proxecto Neo, 405.13: Marta P. Freire (Bico de Grao); Catalina Caamaño (C. de Saúde-Burela); Javier Saco (Escolapios)

O grupo de traballo que realizou o programa 405 foi visitado pola directora, María José Pardiñas.

Por indicación do Instituto Muralla Romana da cidade de Lugo, entramos en comunicación coa cooperativa Bico de Grao, situada na Ronda das Fontiñas. Marta Pérez Freire atendeu a nosa chamada e explicounos en panorámica as actividades de carácter comercial e socio-educativas que realizan. Puxo especial énfase na importancia do uso do idioma galego nas expresións oral e escrita, na atención presencial e na comunicación a través das redes sociais. Por iso a consideramos un modelo de boas prácticas dentro da iniciativa AQUÍ TAMÉN SE FALA.

A farmacéutica Catalina Caamaño, do Centro de Saúde de Burela, visitounos no estudio para explicarnos as razóns que levaron o Concello de Burela a participar activamente no Plan Estratéxico de Saúde Nacional e convidounos a asistir ao acto de presentación a celebrar o día 19 de xaneiro no Auditorio Municipal.

No terceiro dos contidos, subimos un novo nivel. Nicolás Amorín conversou co profesor Javier Saco, docente no Centro de Ensino dos Padres Escolapios de Monforte. Nós felicitámolo por estar entre os dez finalistas do Premio Educa e el presentounos o seu caderno de bitácora www.elrincondeleonardo.com

Proxecto Neo, 404.13: Estela Rial Suárez (IES da Illa de Arousa); Vanessa Vila-Verde; Bernardo Penabade

Na xornada do día 10 de xaneiro de 2024 chegou o programa de número capicúa: 404. Para celebrar data tan sinalada queríamos unha entrevista especial e o profesor Emilio Cambeiro, do IES Illa de Arousa, facilitounos esa oportunidade. A través del tivemos coñecemento do potencial de Estela Rial Suárez, con quen entramos en comunicación e de quen recibimos todas as facilidades para a colaboración con Proxecto Neo.

Unha profesora de Lingua e Literatura facendo unha entrevista a unha estudante de 4º de ESO. A distancia era só física, 300 km; o resto era a sintonía plena dos latidos do orgullo de ser.

Con esta forza e esta ilusión comezamos este novo ano, en que estreamos nova coordenación e recibimos a axuda de Ian García Vallecillo, Patrick Djeição Gomes Correia e Yúri de Jesus Monteiro Gomes.

Benvida, profesora Vanessa Vila-Verde!

Primeiro programa coordenado pola profesora Vanessa Vila-Verde

Proxecto Neo, 403.13: Escola dos Castros (Burela); Vanesa Vila Verde; Alberto Pombo (Aquí tamén se fala...)

Neste programa 403, o derradeiro do ano 2023, contamos con tres colaboracións da Escola dos Castros: unhas adiviñas, un poema dedicado ao Apalpador e unha canción interpretada e gravada no propio centro educativo.

Despois falamos da FOLIADA INTERNACIONAL MODELO BURELA a celebrar durante a noite do día 22 de decembro no Centro Social Xebra. A profesora Vanesa Vila Verde presentou a actividade, falounos das Soalhas (as artistas que conducirán o evento) e convidounos a asistir activamente (isto é;: convidounos a levar un instrumento musical ou a poñer a voz para cantar).

A terceira parte do programa estivo protagonizada polo profesor Alberto Pombo, do IES Rafael Dieste da Coruña, que nos presentou a nova edición do AQUí TAMÉN SE FALA, que este ano xa conta coa participación de 150 centros educativos e que chegará a uns 10.000 comercios de toda a xeografía galega.

Carmelo, o Apalpador, en visita ao Perdouro.

Proxecto Neo, 402.13: Noely Cardoso Borges; Carla Nepomuceno; Cristian Gómez Mesa; Karina Parga

Desde hai varias semanas, Noely Cardoso Borges é unha voz fundamental no programa. Durante as mañás asiste ás aulas de FP Básica e de tarde asiste ás aulas do programa QUALE e solicita á profesora Vanesa Vila-Verde o asesoramento necesario para locutar a cabeceira de Proxecto Neo. Ás 5 séntese con nervos, mais está preparada.

Neste programa quixemos falar con ela e ela asumiu a entrevista como un servizo ao grupo. Sinceramente, cremos que coa gravación da conversa conseguimos un documento de grande valor pedagóxico.

De grande valor pedagóxico é tamén a entrevista de Hugo F. Galdo (alumno de 2º de ESO) a Carla Nepomuceno, unha autoridade en Lingüística e Pedagoxía. Licenciada en Artes e Humanidades pola Universidade do Mato Grosso, ex-profesora na Universidade Aberta do Brasil, é agora docente no ensino secundario galego (concretamente no IES Gamallo Fierros de Ribadeo).

A alternancia de sotaques durante a conversa é como o fluír das ondas oceánicas que comunican Europa e América. Todo un exemplo de unidade e diversidade lingüística.

Á vista destes dous fragmentos centrais, a parte final do programa -protagonizada por Cristian G. Mesa e Karina Parga- foi un simple complemento. Non deixen de escoitar a primeira entrevista realizada por Nicolás Amorín.

Izan Maseda García durante a realización do programa. A foto é de Lucía Rivas.