Proxecto Neo nº7 - Laura Baumgartner Lucero

Mércores 22 de febreiro, oitava entrega do programa de Proxecto Neo. A convidada é Laura Baumgartner Lucero, alumna do IES Monte Castelo entrevistada por Laura Rapa (alumna do bacharelato de artes do IES Monte Castelo).

Laura Rapa, estudante do segundo curso do Bacharelato de Artes no Instituto Monte Castelo de Burela, preséntanos e colabora na entrevista a Laura Baumgartner Lucero, filla de arxentinos e nacida no País Vasco.
Nun galego extraordinariamente fluído (agora sen as deliciosas "pinguiñas" do sotaque austral), esta moza neofalante preséntanos os seus ascendentes alemáns, italianos... e galegos. Por medio das súas palabras coñecemos as experiencias da aprendizaxe lingüística por inmersión en Inglaterra, Irlanda e a República Checa.

Ademais, neste especial, lembramos a Isaac Díaz Pardo.

Aquí podedes escoitar a tertulia.

Proxecto Neo nº 7- Convidada: Laura Baumgartner Lucero on PhotoPeach

Proxecto Neo nº6 - Antonina Semedo

ANTONINA SEMEDO -  CABO VERDE, SABI

É unha galega que chegou de Cabo Verde?, é unha caboverdiana que vive agora na nosa terra? ou é o resultado dunha simbiose afro-galega?

Alén das cuestións metafísicas, Antonina Semedo é unha muller traballadora. Antende nenos e velliños, coida a horta, ensaia coas Batuko, presenta espectáculos, canta, batuka... É Antonina de Cangas (de Foz).

Aquí están algunhas referencias para coñecela mellor: La Voz de Galicia, Facebook, a Maquina do Tempo

Antonina Semedo Lopes de Barros, nacida en Santa Ana, na illa caboverdiana de Santiago, chegou á Mariña un 23 de xullo de 1978, no momento en que se realizaban as obras da fábrica de aluminio en San Cibrao.

No momento en que outros cidadáns do mesmo país marchaban para Francia, Holanda ou Luxemburgo, Antonina e o seu marido instaláronse en Cangas, onde viven actualmente na compaña dos seus familiares.

Muller Traballadora

Durante os máis de trinta anos que leva vivindo nesta terra, Antonina Semedo realizou os máis diversos traballos, sen perder nunca a orientación do progreso, de buscar permanentemente un mellor nivel de vida para ella e, sobre todo, para a súa xente. En Cangas realizou as máis variadas tarefas domésticas -exactamente igual que as campesiñas galegas-, fixo traballos forestais e recolleu algas pola ribeira. Mais nunca deixou de asistir a cursos de formación, co obxectivo de conseguir unha vida máis desafogada. Actualmente dedícase á atención de persoas maiores ou con discapacidades.

Artista de Batuko Tabanka

Xunto con outras once mulleres da mesma nacionalidade (Ivone Pereira, Fátima Fafá, Fátima Beba Lopes, Ilda e Antonina Rocha, Isabel Barros, Desideria, Lidia Mendes Chuca, Anabella da Moura, María Tabares e Santiña), formou en 2002 o grupo musical Batuko Tabanka.  Ademais de gravaren dous discos, teñen actuado en toda Galiza e Portugal así como en diversidades comunidades españolas e en Cabo Verde, a onde regresaron para participaren na rodaxe da longametraxe documental Cabo Verde, Sabi. A muller e a terra, o home e o mar, dirixida polo profesor Manolo Maseda.

Proxecto Neo nº5 - Mocidade: Nuno García, Ana Carreira e José Manuel Vidal

A HORA DA MOCIDADE - PROTAGONISMO DOS NEOFALANTES

Desta vez os convidados son todos xente moi nova, de entre 16 e 20 anos; mozos e mozas que estudan nos institutos de Burela.

Proxecto Neo nº5 - Convidados: Nuno García, Ana Carreira e José Manuel Vidal on PhotoPeach

Contamos con guía especial: Nuno García Pico, estudante do bacharelato de Humanidades, músico, autor de narrativa moi ben premiada... Falamos de música, de poesía, de viaxes... con xente chegada de Cantabria e de Castela; xente estreitamente relacionada co Hospital da Costa. Todos e todas moi ben integrados nesta nosa cultura común: Ana Carreira e José Manuel Vidal, ambos estudantes do bacharelato de Ciencias da Saúde.
Este é, pois, un dos programas dedicados á mocidade MODELO BURELA.

Podedes escoitar a tertulia en Radio Burela de Radio Fusión aquí.

Proxecto Neo nº4 - Luís Manuel Ramilo Machado e Ricardo Santos Garrido

ENCONTROS DE BANDA DESEÑADA NA MARIÑA -PROTAGONISMO DOS NEOFALANTES

Este mércores 1 de febreiro (entre a 5 e as 6 da tarde) emítese un novo programa. Os convidados serán Luís Manuel Ramilo Machado e Ricardo Santos Garrido, docentes respectivamente dos ciclos de formación profesional das áreas de Imaxe Corporal e Desenvolvemento de Produtos Electrónicos.

Proxecto Neo nº 4 - Convidados: Luís Ramilo e Ricardo Santos on PhotoPeach

Orixinarios do Porriño e de Pontevedra, ambos son neofalantes e participan activamente na divulgación da Banda Deseñada entre a mocidade da Mariña. Ricardo é un dos máximos impulsores dos Encontros de B.D. e Luís participa tamén como dinamizador dos obradoiros de creación artística.

Podedes escoitar a tertulia en Radio Burela de Radio Fusión aquí.

Proxecto Neo nº3 - Catalina Sánchez Luengo

ALUMNADO DE ESO E BACHARELATO PARTICIPA NO PROGRAMA DE INTEGRACIÓN DOS NEOFALANTES EN RADIO BURELA

No cuarto programa Proxecto Neo, a convidada foi Catalina Sánchez Luengo (Mediadora cultural e Xerente da Fundación Expomar). Na entrevista participaron Laura Trelles (IES Perdouro) e Katerine Brito Tavares (IES Monte Castelo), por iniciativa dos respectivos Equipos de Dinamización Lingüística.

Nacida en Villanueva de la Serena (Badaxoz), Catalina Sánchez estudou Economía e Comercio en Madrid e Estocolmo. Chegou a Galiza en 1977 e foi fundadora dunha "comuna" perto da praia de Esteiro (Xove). Desde ese momento participou en primeira liña nos movimentos sociais preocupados pola contaminación emitida pola fábrica de Aluminio, opúxose activamente á implantación dunha central nuclear na Mariña e dinamizou a cultura desde o Concello de Cervo e desde A Zaranda, a célebre sala de Burela moi directamente relacionada coa Sala Nasa de Santiago.

Na tertulia falamos da Xeración Beatnick americana e da súa influencia en Europa (De Ginsberg e Kerouac a Bob Dylan), das emisións de flúor en Alúmina, do papel desempeñado polo cura de Burela na oposición á central nuclear, da etapa de Roberto Álvarez en Burela e Cervo...

Proxecto Neo nº 2 - Marcelino Luna

PLANIFICACIÓN LINGÜÍSTICA "MODELO BURELA": O PROTAGONISMO DOS NEOFALANTES

O 18 de xaneiro de 2012 emitiuse o terceiro programa. O convidado foi Marcelino Luna (director do IES Monte Castelo). Na entrevista participaron Marina Teixeiro Gregori (alumna do IES Perdouro) e José Juan Aponte Gamboa (alumno do IES Monte Castelo)

O programa dedicado aos neofalantes dedicou a terceira entrega ao profesor Marcelino Luna Almarza. Este berciano licenciouse en Filosofía e Psicoloxía na Universidade de Oviedo. Desde 1986 é Profesor Numerario de Filosofía e exerceu primeiro en Vigo e despois en Burela. Desde 2009 é directivo do Burela F.S.

Proxecto Neo nº1 - Karina Parga

PLANIFICACIÓN LINGÜÍSTICA "MODELO BURELA": O PROTAGONISMO DOS NEOFALANTES

O mércores, 11 de xaneiro de 2012, emitiuse o segundo programa. Na entrevista participaron Laura Trelles Díaz (alumna do IES Perdouro) e Bernardo Penabade.

O programa das persoas neofalantes dedicou a segunda entrega a unha entrevista coa profesora Karina Parga Chao (Aillant - Francia; 1975). Esta filla de emigrantes galegos ten estudos de Medicina realizados en Dijon e é licenciada en Filoloxía Francesa pola Universidade de Santiago de Compostela. Desde 2003 é Profesora de Lingua Francesa no IES Perdouro, onde ten baixo a súa responsabilidade a vice-dirección de actividades extraescolares. Desde este cargo, impulsa a realización de actividades de inmersión lingüística en inglés e francés así como a dinamización da biblioteca escolar e os Encontros de Banda Deseñada da Mariña.