Proxecto Neo 433.14: Especial Radio Saúde Burela

 

O programa 433.14 é un monográfico dedicado á atención sanitaria. Coa axuda de Catalina Caamaño, farmacéutica do Centro de Saúde de Burela, conversamos con Alicia Rama, traballadora social no Servizo Galego de Saúde, unha das responsábeis da Rede Galega de Promoción de Saúde na Área Sanitaria de Lugo.

Feita esta contextualización inicial, coñecemos en que estado está (no ámbito local) a ponte de comunicación entre as escolas e a Estratexia de Prevención da Saúde.

Polo sector sanitario, tamén nos acompañaron no estudio, Rocío López, do Instituto Monte Castelo; Miruca Parga, Vicedirectora do Instituto Perdouro; e Pepa Amor, da Escola Virxe do Carme, dos Castros.

Finalizamos o programa coa intervención de tres autoridades do sistema sanitario no ámbito local: Maite Lanza, da Unidade de Asistencia á Drogodependencia; Rosa Fraga, de Atención Temperá; e Aránzazu de Miguel, médica de Atención Primaria.

Foto de familia do grupo de persoas que participaron de maneira presencial no programa de Radio Saúde-Burela. De esquerda a dereita: Shiva Alinda Nurhackin; Aránzazu de Miguel Gómez; Miruca Parga; Karina Parga; Iago Rodríguez; Rosa Fraga; Vanessa Vila-Verde; Manuela Pintor; Maite Lanza; Catalina Caamaño.

Foto: Lucía Rivas.

Proxecto Neo 432.14: Aarón Bermúdez; Moraima Yáñez; Pedro Lamas.

Abrimos o programa 432 cos espazos colaborativos: “a noticia do día”; e a crónica dunha viaxe educativa a Samos. Esta crónica foi unha nova colaboración do profesor Fernando Losada.

Despois de viaxarmos ao Cebreiro e a Samos, regresamos á Mariña para conversarmos cun deportista convaleciente. Ese deportista convaleciente dunha lesión de gravidade chámase Aarón Bermúdez.

A terceira convidada desta entrega foi unha comerciante moi coñecida en Burela, Moraima, a propietaria da Confitería KIKO. Con Moraima, entrevistada por Caetana, abrimos a sección: Mulleres emprededoras.

Pechamos o programa conversando con Pedro Lamas, músico participante na Homenaxe a Joám Vicente Viqueira, organizada no día en que se cumpría o centenario do seu nacemento: o 22 de outubro de 2024.

  Pedro Lamas, entrevistado neste programa, é un dos artistas que acturaron na homenaxe a Viqueira celebrada no cemiterio de Ouces. Con el están Eva Otero e Marta Pumares.

Proxecto Neo 431.14: Xema Sanxurxo; José Maria Díaz; Nádia Cabral Moniz Gonçalves.

Abrimos o programa 431 con Xema Sanxurxo, colaboradora de Proxecto Neo e Coordinadora do Equipo de Normalización Lingüística. Con esta coruñesa falamos de ensino, de música e de moitos outros temas.

Despois da entrevista realizada por Moustaphá Sarr, recibimos a visita de Jose, que se define como “Proxecto de Mestre”. El foi quen nos presentou a iniciativa “Máis que particulares”.

A terceira convidada desta entrega do programa foi Nádia Cabral Moniz Gonçalves. Esta moza, orixinaria da cidade da Praia, a capital de Cabo-Verde, chegou a Burela no ano 2020. Con ela falamos contra o final.

Proxecto Neo 430.14: Shiva Alinda Nurhackin; Johana Haz Sar; Iván Penelo

A primeira convidada do programa desta tarde foi a nosa compañeira Shiva Alinda Nurhackim.

Shiva estivo mostrando estes días a súa obra artística no programa “Quen anda aí?”, da Televisión de Galicia.

Grazas ao programa da Televisión Galega, Shiva retomou o contacto cunha amiga da infancia e nós tamén falamos esta tarde con ela.

Chámase Johana Haz Sar. É de Muxía e estuda no Instituto Terra de Soneira, en Vimianzo.

Nesta nova entrega do programa conversamos tamén con Iván Penelo, Técnico en Saúde Ambiental, con estudos realizados no Instituto Monte Castelo; e Pedagogo, pola Universidade de Santiago.

Iván Penelo é presidente do Burela Surf Club e ademais traballa no Centro San Aníbal, de Burela.

Proxecto Neo 429.14: María García Abad; Javier Mogo Torrado; Bríxida Pino

Abrimos o programa desta tarde coa colaboración do profesor Fernando Losada, que nos fixo crónica da visita educativa con alumnas e alumnos de bacharelato ao Instituto de Investigación Sanitaria de Santiago.

Despois da colaboración do profesor Fernando Losada e da primeira das músicas, conversamos con María García Abad, estudante de Artes.

Con María García Abad falamos de teatro, de patinaxe, de ximnasia rítmica e incluso de Artes Marciais.

Despois da nosa conversa con María García, coñecemos o noso profesor Javier Mogo Torrado, da área de Administración.

Nos minutos finais, o protagonismo foi para o centenario da Escola de Burela.

Do centro escolar construído con diñeiro da emigración, que abriu as súas portas en 1924 (hai agora un século), falamos coa profesora Bríxida Pino, presidenta da Asociación de Veciños “O Vencello”.

Proxecto Neo 428.14: Yago Fernández Rubiños; Lara Oliveros Ben; Alberto Rapa.

Abrimos programa en conversa cun estudante do bacharelato de Ciencias. Chámase Yago Fernández Rubiños. O noso convidado practica pintura na Academia Mancharte, fai teatro na ADALA de Fazouro e é voluntario no Grupo de Participación Xuvenil e na Cruz Vermella de Burela.

A segunda convidada -que tamén nos acompañou no estudio- foi Lara Oliveros Ben, Economitas pola Universidade da Coruña e docente de Economía no Instituto Perdouro. 

A profesora Lara Oliveros presentounos o Proxecto Educativo: ACTIVA A TÚA VOZ.

Nos minutos finais falamos de fotografía. Concretamente do CLUBE FOTOGRÁFICO IMAXE que, despois dunha pausa no camiño, toma novos folgos para prolongar os seus trinta e dous anos de historia.

De Fotografía e do Clube fotográfico Imaxe, falamos co presidente da entidade: ALBERTO RAPA.

Lara Oliveros foi entrevistada en Proxecto Neo. Presentou o programa
Activa a túa voz.

Proxecto Neo 427.14: Catalina Caamaño; Maria José Cortés Canay; Iago Míguez; Lina Gómez Pardo.

Abrimos a décimo cuarta etapa cunha entrevista a unha das nosas colaboradoras: Catalina Caamaño Isorna, farmacéutica do Centro de Saúde de Burela. Con Catalina Caamaño falamos primeiro de diálogo entre culturas. E despois presentamos unha actividade moi directamente relacionada coa saúde: A Semana da Mobilidade.

O ámbito da Saúde tamén estivo representado pola segunda das convidadas: María José Cortés Canay, Directora do Hospital da Mariña.

Neste programa en Feminino Plural, a nosa terceira convidada representou a ponte entre a escola e a participación política. Lina Gómez Pardo, concelleira de Cultura, mestra de profesión, presentounos o programa da Semana da Mobilidade.

Con Lina Gómez Pardo estivo tamén Iago Míguez, Técnico de Deportes do Concello de Burela.