PROXECTO NEO, nº 137.- Carmen Fernández Morante; Adela Figueroa, Montserrat Lombardía, Pepe Paz; Fran Rei

Lucía Rivas captou o momento da entrevista feita a través
do programa Skype

 

Comezamos o programa 137 escoitando unha peza musical con mensaxe de ánimo e motivación. Despois de proclamar ao unísono "Sexa // o que for", entramos en contacto con Dna. Carmen Fernández Morante, que nos atendeu desde Santander, e a quen Mónica Palacios presentou como: "unha profesora con currículo Modelo Burela, porque é especialista en tecnoloxía educativa; porque imparte ensino sobre as novas tecnoloxías aplicadas á educación; e tamén pola súa traxectoria intercultural".

Na entrevista, co son do traballo de Lucía Rivas ao fondo, falamos de moi diversos temas, entre eles a adaptación da neofalante á nosa terra, "onde levo media vida" -segundo nos dixo. Despois, a profesora Morante presentounos as titulacións da Faculdade de Ciencias da Educación da USC, que son seguidas por máis de dous millares de futuros docentes. A seguir respondeu unha pregunta moi directa de Maka Ledo: "Cre que o sistema escolar está respondendo ben aos avances tecnolóxicos?"; falou da atención á diversidade; e finalmente da presenza do multiculturalismo no ensino superior.

No punto final da entrevista... a música!

Como voando, dirixímonos á India para conversar cunha grande amiga de Proxecto Neo: Adela Figueroa Panisse. A profesora luguesa atendeunos desde Shantiniketam, onde estaba acompañada pola tamén profesora Montserrat Lombardía. Ambas facían visita ao pedagogo Pepe Paz, impulsor dunha Casa da Galiza naquela terra. Na voz dos protagonistas, tivemos información sobre a presenza do idioma galego en Goa, do ensino solidario na Bengala... e de moitos temas.

Mentres facíamos entrevista, recibimos chamada de Marco Pereira Oliveira, que interviu en directo. Foi bonito unir Burela, Xove e a Mariña toda co oriente asiático.

No último cuarto, tributamos homenaxe a Manuel María. Primeiro Lavilson Rodrigues e Alex Landim fixeron crónica dunha viaxe de estudos á Casa Museo de Outeiro de Rei e despois Fran Rei púxonos o contrapunto para a mesma información.

Proxecto Neo, 129.- Haizea Barcenilla; Adela Figueroa; Marita Faraldo; Paco Veiga; You Gómez

ESCOITA AQUÍ O PROGRAMA

Haizea Barcenilla é profesora da Universidade do País Vasco e combina a docencia co xornalismo no Berría, xornal en que publica habitualmente crónicas e crítica de arte. Desde hai uns anos mantén vínculos coa nosa terra e fainos grande honra integrándose na nosa cultura. A súa fluidez comunicativa en galego é tan elevada que aceptou facernos crónica do desenvolvemento das Xornadas Galizaleak celebradas en Bilbao. Non sorprende que Karina Parga manifestase o noso absoluto asombro pola música da fala que estábamos escoitando.
Sen pausa musical, deixamos Euskadi e retornamos a Lugo. Na capital amurallada atendeunos Adela Figueroa para presentarnos os contidos da VIIª Feira da Primavera a celebrar na Eira da Xoana, entre Palas de Rei, Melide e Agolada. 

Despois dunha música moi movida -e a través de Silvera V. de Oliveira- coñecemos a profesora Marita Faraldo, do Departamento de Imaxe Persoal do Instituto Perdouro. Con ela falamos da súa formación en Perrucaría e Estética no Instituto Fernando Wirtz da Coruña, da necesidade de complementar os estudos (no seu cado cun Mestrado en Barcelona) e aínda da importancia do espírito emprendedor nun sector laboral en que é difícil conseguir estabilidade.
Maka acertou coa pregunta contudente: "Marita, que lle dirías a un mozo ou a unha moza que está en dúbidas de se matricular no ciclo de Imaxe Persoal?".
A resposta de Marita non foi nada menos contundente!
Despois de que a profesora nos abrise os ollos, puxémonos en contacto co Mestre Paco Veiga, que foi agraciado co premio Terra de Melide, polo seu labor continuado de promoción da cultura galega. Felicitámolo en vivo e en directo... e comprometémolo a unha próxima colaboración no noso programa.

Xa na parte final, falamos con Yao, unha estudante de 1º de ESO no Instituto Manuel Murguía de Arteixo. Un final impresionante!

DÍA DA DIVERSIDADE CULTURAL

ADELA FIGUEROA

(integrante de ADEGA)

Combinamos passeio polas terras da Ulhoa com o intercâmbio cultural nascido de entre as pessoas que partilharam conosco este Dia da Diversidade Cultural. Já vai para três anos que na Eira da Xoana celebramos esta data. Coincidindo com o Dia das Letras Galegas, dia mais dia menos.

Sendo -como somos- entidade ecologista, e não querendo furtar-nos à celebração da língua e da cultura, fazemos esta homenagem à diversidade. Não só biológica, mas também às diversas culturas que o ser humano tem criado sobre a Terra.

De início fomos andar trás das pegadas dos antigos habitantes da Ulhoa, começando o nosso roteiro pelo Castelo de Pambre, fortaleza que resistiu o ataque irmandinho. Infelizmente não foi tão resistente ao passar dos anos e ao mal cuidado, mas ainda mostra uma magnífica figura. Hoje está em fase de restauro e não se pode visitar. Só por fora. Contornamos o castelo polo antigo caminho real, até chegarmos ao Castro de Remonde.

ADEGA tem adquirido, dentro do recinto do castro, a zona que ocupa a croa. Nesta Terra chamam-lhe a cubela. Ou seja a parte realmente habitada do castro. Lá paramos no lugar que teria ocupado a porta ao recinto habitado e, baixo o bosque de carvalhos que agora existe, falamos dos celtas, dos castrejos e dos seus costumes. Gago, jornalista especializado em arqueologia ilustrou-nos acerca destes pormenores.

Tínhamos também a companhia do esperto em botânica, o doutor Amigo, que manifestou a sua preocupação polo deterioro da paisagem galega, que sofre da monotonia da eucaliptização, por contraste com estas terras da Ulhoa em que ainda ficam testemunhos do nosso bosque autóctone, mália as novas plantações que começam a inçar, quer nas beiras do castro quer onde queira que levemos a vista.

Este é um grande problema ambiental na Galiza de hoje para o qual muitas vozes levantam o seu desassossego preocupadas com o devir do nosso ambiente. Sabemos que estas massas uniformes que já cobrem a maioria dos montes galegos (e não só, prados, terras férteis, etc) trazem a perda da diversidade biológica que nos ameaça assim como perda de solo fértil e destruição de muitos habitats animais. Por isso ADEGA tem levantado a campanha "Cousa de Raízes" tentando pôr em destaque esta problemática e as suas possíveis soluções.

O Roteiro acabou no moinho do castelo cuja ponte sobre o rio Pambre está recentemente restaurada. Neste dia descia bravo em cachoeiras e fervenças.

Já de volta na casa da Eira da Xoana celebramos o jantar de fraternidade partilhando os diferentes pratos que cada quem trouxo: empada galega, polvo e salsas peruanas forneceram uma mesa diversa e rica. Ainda tudo bem saboroso. 

Amável foi também a sobremesa de dozes variados e de paroladas diversas. Ouvimos cantigas quéchuas, contos uruguaios, músicas argentinas, poesias brasileiras e galegas. Pepe Paz deleitou-nos com o relato das suas experiências da Índia onde mora seis meses por ano. Lá tem ele uma Casa da Galiza aberta a quem quiser ir, onde dá comida a meninos sem casta, e trabalha na Universidade Tagoreana.

Contos galegos também não faltaram da parte do Celsinho, conta-contos de Lalim, que já é um visitante assíduo da nossa casinha.

O suave sol de primavera alegrou a jornada e as folhas dos carvalhos e castinheiros do Eirado deram a sombra justa para um dia luminoso e feliz. Guardamos a nossa cultura e cultivamo-la para que nunca desapareça. Para divertir-nos e gozar com ela. Para afortalarmo-nos como povo na certeza do nosso futuro que garantimos através dos contos, as lendas os cantos e o convívio. Conhecemos o nosso rico passado e desfrutamos deste presente entre amigas, colegas e gente vinda doutros lados. Toda a Terra é da gente e dos seres vivos que nela habitam.

Desde a Eira da Xoana enviamos o nosso convite a comunhão com a Terra e com as diferentes culturas que nela se criaram. E com todos os seres vivos que nela fazem a sua casa. 

Proxecto Neo nº 118.- Xosé Neira Vilas, Orlando González Cruz, Antonio Reigosa e Adela Figueroa

Comezamos o programa en conversa con Xosé Neira Vilas, que nos atendeu desde a sede da Función que leva o seu nome. Maka Ledo recordou a visita que lle fixemos o día 3 de marzo e deulle as grazas en nome de todos os compañeiros de expedición. En plena conversa, Neira Vilas foi saudado en directo por Silvera Vicente de Oliveira, que nos contou as súas impresións da visita. Uns minutos antes, Noelia Parga Gaitica puxéralle voz á biografía de Anísia Miranda (Cuba: 1932- Galiza: 2008).

No final da entrevista, Proxecto Neo quixo ofrecerlle un simbólico regalo ao autor de "Ai, Amor", o célebre poema que foi musicado con moito éxito polos integrantes d'A Quenlla (o grupo musical en que participou durante varios anos Antón Crego). Ese regalo tivo como protagonista a Maka Ledo, que recitou en directo o poema gañador do Certame de  Poesía convocado polo Concello de Foz para conmemorar o día dos namorados.

Despois de escoitarmos outra canción da formación musical capitaneada por Mini e Mero -neste caso as "Memorias dun neno labrego"-, pasamos a abordar a inauguración do Roteiro Literario Leiras Pulpeiro. O primeiro dos entrevistados foi o alcalde de Mondoñedo, Orlando González Cruz, que se mostrou orgulloso de como se desenvolveron todas as actividades ao tempo que manifestou público agradecemento a todas as entidades que o fixeron posíbel (Asociación Facendo Camiño; Comarca de Mondoñedo Unida; ACIAM; e Instituto San Rosendo).

Na mesma entrevista, Maca Ledo falou co rexedor mindoniense sobre a súa condición de neofalante do idioma galego, dado que estivo vivindo case trinta anos no Uruguai. A entrevistadora preguntoulle polas condicións de integración durante a fase de retorno á nosa terra así como polo mesmo proceso experimentado polas súas fillas, nacidas na citada república sudamericana.

Finalizada a entrevista co primeiro edil de Mondoñedo, Karina Parga púxose en contacto con Antonio Reigosa, que nos falou desta vez en calidade de Cronista Oficial "da capital da nosa provincia histórica". O autor das Memorias dun raposo tamén se mostrou moi satisfeito co resultado do evento celebrado o pasado venres, día 6 de marzo.

Na parte final do programa, falamos con Adela Figueroa Panisse. A profesora e militante ambientalista convidounos a asistir ao IIº Aturujo pola Terra a celebrar durante a xornada do 28 de marzo na Eira da Xoana, moi perto de Vilar das Donas e o Castelo de Pambre.
Como se fixera con Xosé Neira Vilas, a representante de ADEGA foi presenteada por Proxecto Neo co recitado dun poema. Neste caso a declamante foi a alumna Kátia da Veiga Gomes, que lle puxo voz ao poema intitulado "Chachauí", de Antón Avilés de Taramancos.