Proxecto Neo, 283.9: Roberto Catoira (ESCOLAPIOS -Coruña); Adela Figueroa (escritora); Paloma López (OMI); Diego Campo (Asoc. Fanto Fantini)

Abrimos o programa con ROBERTO CATOIRA , profesor no Colexio dos Padres Escolapios na Coruña. O tema da conversa: a radio como ferramenta educativa.

Inmediatamente despois tivemos poesía de temática ambientalista. Escoitamos un poema na voz da súa autora: ADELA FIGUEROA, premio ROSA DE CEN FOLLAS-2019.

A segunda parte estivo dedicada integramente á GALA

SOLIDARIA a celebrar en Burela o próximo día 28 de decembro. Primeiro conversamos con PALOMA LÓPEZ-LEITÓN, do Observatorio da Mariña pola Igualdade; e despois atendeunos Diego Campo, en representación da Asociación Fanto Fantini, outra das entidades implicadas nesta gala benéfica. Nos minutos finais conseguimos comunicar con Alex Djimmy, que nos atendeu desde Porto Mosquito, na Illa de Santiago (en Cabo Verde). Confirmounos a súa presenza no festival.

Proxecto Neo, 282.9: Isabel Fernández (Col. Sagrado Corazón-Ribadeo); Manuel Pumares; Mónica Ferreiro; Aida Tarrío

A profesora Isabel Fernández, do Colexio Sagrado Corazón de Ribadeo, presentounos o proxecto educativo "Na fronte unha estrela, no bico un cantar", gañador do Certame Irmán Reboiras para proxectos de normalización do idioma galego.

Manuel Pumares, actor da longametraxe Longa noite, de Eloy Enciso, falounos da súa participación neste filme e comentounos vivencias da gravación e da estrea.

Con Mónica Ferreiro falamos sobre Vida, a película de Rubén Riós, que continúa presente nas pantallas de diversas institucións empeñadas na inclusión social.

A última das entrevistas estivo protagonizada por Aida Tarrío, das Tanxugueiras, que nos presentaron o seu último disco: Contrapunto.

Proxecto Neo, 281.9: Carmen Viñas (IES San Clemente); Xurxo Souto (Diplomáticos)

A profesora Carmen Viñas, do IES San Clemente, falounos da oferta educativa do centro que dirixe. Falamos de formación profesional, de Eso e bacharelato a distancia, do ensino para a poboación reclusa dos cárceres da Lama, Monterroso, Bonxe e Teixeiro; e aínda doutros temas.Na segunda parte do programa o noso entrevistado foi Xurxo Souto, que nos falou sobre o 25º aniversario do Bravú. Durante uns minutos retornamos a 1994 e a partir dese momento fomos vendo a evolución musical e social propiciada por este movemento.

ROSA CARAMELO (Colaboración do Colexio Virxe do Carme - Burela)

Gravación dun relato feita pola profesora Eva Lastra e o alumnado do 1º curso. Rosa Caramelo ten unha magnífica narración acompañada de música.

Trátase dunha nova colaboración do Colexio Virxe do Carme de Burela, con quen xa temos realizado obradoiros de iniciación á linguaxe radiofónica.

Proxecto Neo, 280.9: Pedro Rielo (escritor e xornalista da TVG); Benxamín Soto Cotón (Presidente da A. C. Os Matos)

Programa organizado en dúas partes. Abrimolo cunha entrevista co escritor Pedro Rielo Lamela (Pontevedra, 1972), a quen xa coñecíamos a través da pantalla da TELEVISIÓN DE GALICIA. Falamos sobre a obra gañadora do Premio Neira Vilas: Detrás dos perdidos.

Na segunda parte falamos co profesor Benxamín Soto Cotón (Viveiro, 1980), novo presidente da Asociación Cultural Os Matos.

Proxecto Neo, 279.9: Álvaro Gago Díaz; Daniel Otero (TEATRO MÍNIMO); Fran Ameixeiras; Txitxo (Martelos-Costa Norte)

O cineasta Álvaro Gago Díaz gañou por segundo ano consecutivo o Premio Armadiña de curtametraxes, desta vez cun filme titulado "16 de novembro". Nós falamos co director sobre os premios, sobre as obras e sobre a súa traxectoria.

Despois de falarmos de cinema, conversamos sobre teatro. O primeiro convidado foi o actor Daniel Otero, de Teatro Mínimo, que nos presentou o espectáculo que leva por título "A vía láctea". O terceiro dos contidos, tamén sobre teatro, foi unha entrevista ao actor e director Fran Ameixeiras, que nos sintetizou a súa traxectoria e que nos falou do recente percurso polo Brasil e a Arxentina.

A cuarta e última parte estivo dedicada á asociación de moteiros Martelos-Costa Norte. Txitxo, de Viveiro, fíxonos crónica do Martelazo Rock celebrado en Xove no pasado mes de setembro e adiantounos que a súa segunda edición xa está en marcha.

Proxecto Neo, 278.9: Mestrado de Educación da USC; Eduardo Maragoto (AGAL); Federico Cachafeiro (Asoc. Avelino Díaz)

Grazas á iniciativa da profesora Luz Zas, con este programa entramos nunha sala de aulas da Faculdade de Filoloxía da Universidade de Santiago de Compostela para facermos interlocución co alumnado do Mestrado de Educación.

Pola súa parte, o profesor Eduardo Maragoto atendeu a nosa chamada e nós felicitámolo pola renovación por segunda vez consecutiva no cargo de Presidente da AGAL. Naturalmente, tamén falamos do eixo central das actividades da asociación para o ano 2020, o da celebración do Dia das Letras Galegas dedicado a Ricardo Carvalho Calero.

Coa axuda de Federico Cachafeiro, de Meira, demos a coñecer a xornada de celebración do 122º aniversario do nacemento do escritor Avelino Díaz.

Proxecto Neo, 277.9: Serxio A. Mon; Antón Castro; Dolores L. Caión (Carballo Vivo-Friol); Mónica Fernández Valencia (Youtubeir@s)

Imaxe da Masa Coral Modelo Burela no día da integración activa do novo integrante, o mozo Antón Castro Rivas

Comezamos coa crónica dunha viaxe a Irlanda. O privilexiado cronista foi Serxio Alonso Mon, unha das voces da Masa Coral Modelo Burela. A través do seu relato viaxamos en avión a Dublín e alí tomamos un coche alugado para coñecermos a parte meridional da illa. Recreámonos na cidade de Cork e na visita á pedra da elocuencia.

A seguinte entrevista foi a de presentación dun novo integrante do equipo, que aproveitou moi positivamente o período de toma de contacto co medio. Antón Castro Rivas, de 2º de ESO, falounos das súas orixes na parroquia de Santa María Maior, no concello de Mondoñedo.

Dolores López Caión presentounos desde Friol o programa da xornada cultural dedicada ao ensaísta Celestino Fernández de la Vega, unha actividade organizada pola asociación Carballo Vivo.

Desde a cidade de Ourense, Mónica Fernández Valencia (técnica do servizo municipal de normalización lingüística) falounos do certame Youtubeir@s, que tivo un grande éxito de participación.
Neste programa tivemos tamén outra nova colaboración da comunidade educativa do Colexio Virxe do Carme, de Burela. É a gravación dun relato orixinal da alumna Laura Eixo, con acompañamento musical de Brais Cuba, Íker Dias e Sofía Fraile. A xentileza debémoslla ao profesor Roi R. Cagiao, colaborador do programa.

Proxecto Neo, 276.9: Ruth Fidalgo Varela (locutora); Minda Lusquiños; Elena Samartino; Conchi Pernas

O programa 276 estivo dedicado ao Iº Curso de Língua, Literatura e Cultura de Cabo Verde. A primeira entrevistada foi Ruth Fidalgo Varela, colaboradora do Grandes Vozes do Nosso Mundo, o programa de contidos musicais dirixido por Marco Pereira.

Minda Lusquiños, Traballadora Social do Centro de Saúde de Burela, comentounos a súa experiencia na atención a inmigrantes.

A profesora Elena Samartino compartiu coa nosa audiencia o seu coñecemento de Cabo Verde, país en que exerceu a docencia dentro dun programa de intercambio educativo.

Finalmente, atendeunos Conchi Pernas Díaz -Técnica de Inmigración do Concello de Burela- que nos falou dos servizos que presta o servizo municipal para o que traballa.

Proxecto Neo, 275.9: António Firmino (prof. de lingua cabo-verdiana); Serafín Parcero (escritor)

Capa da obra de Serafín Parcero (Ed. do Peirao)

Programa 275. Celebrámolo co profesor cabo-verdiano Antonio Firmino e co escritor galego Serafín Parcero.Ao ritmo do Cabo Verde sabi, dos Diplomáticos (capitaneados nesta ocasión por Manolo Maseda), entramos na conversa co primeiro profesor de lingua cabo-verdiana nun curso celebrado na localidade de Burela.

Na segunda parte do programa, o protagonismo foi para o escritor Serafín Parcero, que presenta nova obra narrativa: Viúvas de vivos e de mortos.

O Dr. António Firmino no IES Perdouro durante a entrevista retransmitida ao vivo por Radio Burela

Proxecto Neo, 274.9: Dores Fernández Abel (Premio Mendinho); Rodrigo Costoya (escritor); Antón Niñe (ensaísta)

En caso de non haber outro instrumento cortante, sempre se pode procurar unha maneira "orixinal" de repartir unha regueifa, que resulta moi gorentosa despois das tensións do programa.

Dores Fernández Abel é a profesora do ensino medio galego con maior volume de alumnado na materia de Lingua Portuguesa. Con ela falamos do momento en que comezou esta experiencia didáctica (2012) e da evolución posterior. Foi con motivo do Premio Mendinho, que recoñece o seu extraordinario exercicio docente.

Desde Compostela, Rodrigo Costoya colaborou con nós facendo unha animación á lectura de Portosanto, primeira entrega dunha triloxía narrativa. A través da entrevista feita a dúas voces por Cristian Gómez e Nuria Ramos, soubemos que nas páxinas desta obra cobran vida Cristovo Colón e Pedro Madruga.

O profesor Antón Niñe convidounos á presentación de Navegando a bordo do San Lorenzo de Foz, un ensaio de temática histórica centrado no transporte de cabotaxe realizado neste barco feito nos estaleiros Gondán e con base en Foz.

Proxecto Neo, 273.9: Pilar Sampedro (F. Neira Vilas); Armando Requeixo (Museo Cunqueiro); Lupe Blanco (Enreguéifate)

A profesora Pilar Sampedro, en representación da Fundación Neira Vilas, falounos de "Co pai" (Ed. Galaxia), nova obra de publicación póstuma do escritor de Gres. Aproveitamos para divulgar a súa presentación no café A Sacabeira, de Sargadelos. Despois da "Derradeira elexía a Manuel Antonio", musicada por César Morám, o protagonista da conversa foi o profesor Armando Requeixo, que nos presentou o programa de actividades da Casa Museo Álvaro Cunqueiro, a celebrar entre os días 22 de decembro de 2019 e 28 de febreiro de 2020.

O terceiro dos contidos foi unha entrevista coa artista da improvisación oral Lupe Blanco. Con ela fixemos crónica do acto de entrega dos premios Mil Primaveras e adiantamos algo da gala Enreguéifate, a celebrar no Teatro Principal en Compostela.

Proxecto Neo, 272.9: Carme Vilariño (AS-PG); Chusé Raúl Usón; Antonio Ben

A profesora Carme Vilariño presentounos as bases do XVIII Certame "Tíralle da Lingua". Aproveitamos tamén para divulgar a convocatoria da nova edición do certame de Curtas ASPG e para dar a coñecer a iniciativa 70minutos.com, da que aínda falaremos máis nos próximos programas.

Desde Aragón, o escritor e editor Chusé Raúl Usón fíxonos unha radiografía da situación xeral da lingua aragonesa e inmediatamente despois presentounos a súa obra literaria.

Nos minutos finais, falamos con Antonio Ben, a quen transmitimos en vivo e en directo os parabéns polo magnífico resultado obtido polo seu fillo, o atleta Adrián Ben, nos campionatos mundiais de atletismo celebrados en Doha.

Proxecto Neo, 271.9: Conchi Pernas (Fondo Galego); Anxos Sobriño; Natalia Monje (Ecos do Sur); Milagrosa Ferrero (UNED)

O programa 271 comezou con dúas crónicas. A primeira foi de Conchi Pernas Díaz, Técnica de Atención á Inmigración do Concello de Burela, que nos resumiu o elenco de actividades desenvolvidas polo economista mozambicano Onofre Muianga en varios concellos galegos como resultado da iniciativa do Fondo Galego de Cooperación e Solidariedade.

A protagonista da segunda crónica foi Anxos Sobriño, presidenta da Coordenadora de Traballadoras e Traballadores da Normalización da Lingua (CTNL). Con ela repasamos os obxectivos dos premios Mil Primaveras e comentamos o desenvolvimento da cerimonia de entrega realizada no Pazo da Cultura de Pontevedra.

Natalia Monje, de Ecos do Sur, presentounos un concurso de vídeo destinados en favor da convivencia entre persoas de diferentes razas e culturas. É o CibeRespect, do que ofrecemos cumprida información.

Para tratar o último dos contidos tivemos a colaboración de Milagrosa Ferrero, que nos atendeu en representación da aula da UNED en Viveiro para presentarnos as xornadas de portas abertas organizadas por aquela institución.

Proxecto Neo, 270.9: Andrea G. Corzo (Fondo Galego); Onofre Muianga; Manuel Fuentes (Deputación da Coruña)

A 9ª etapa comezou cun programa especial dedicado á cooperación e solidariedade internacional. A primeira entrevistada foi Andrea G. Corzo, do Fondo Galego, entidade promotora do programa "Vacacións con traballo".

Un dos participantes nese programa é o mozambicano Onofre Muianga, que iniciou en Burela un período de formación que o levará durante un mes por catro concellos galegos: o citado Burela, Cabanas, Outes e Moaña. Con el fixemos a entrevista central.

No último terzo do espazo puxémonos en contacto con Manuel Fuentes, funcionario da Deputación da Coruña, que nos comentou o resultado da súa experiencia en Mozambique, onde estivo como cooperante.

Proxecto Neo, 269.8: Alba Fernández (A Sacabeira-Sargadelos); Brais Costas Fragueiro; Dr. José Martínez-Romero; Adela Figueroa

Alba Fernández presentounos o Café Cultural A Sacabeira, situado na zona das vellas fábricas de Sargadelos. Falounos da decoración e do programa de actividades culturais entre as que están as exposicións de pintura e fotografía, as presentacións de libros e os espectáculos de música e teatro.

Neste programa tamén coñecemos o estudante Brais Costas Fragueiro, que alcanzou a máxima cualificación (13'94) nas probas de acceso á universidade celebradas hai dúas semanas. Durante a conversa soubemos que no próximo curso estudará Filoloxía Galega na Universidade de Santiago.

Co Dr. José Martínez-Romero falamos sobre a cerimonia do seu casamento, celebrado en Buenos Aires un 7 de xullo de 1967, pouco despois do Concilio Vaticano IIº (que abriu as portas á pluralidade lingüística).

Nos minutos finais conversamos coa escritora Adela Figueroa Panisse, representante da literatura galega no Encontro de Escritores e Escritoras dos países de raíz galega celebrado recentemente en Cabo Verde.

Proxecto Neo, 268.8: Gabriela Pedre Lastra; Irene Basanta Díaz; Miruca Parga; Territorio Verde

Programa en que se fala e se canta regueifas. Programa en que se fala de premios gañados por traballos sobre a obra da escritora Antía Yáñez. Programa de homenaxe aos 25 anos da revista Maruxía. Todo isto e aínda máis, como por exemplo a iniciativa de Territorio Verde.

Proxecto Neo, 267.8: Cándido Cosme Pichel; O salto e Sotaques; Vítor Lourenço (Casino de Carballo)

Con Cándido Cosme Pichel, do Restaurante Victoria, de Forcarei, falamos de produtos de proximidade, de gastronomía e tamén de publicidade.

A través da entrevista con Elena Martín Lores e Pablo Santiago, coñecemos o xornal O Salto (antes Diagonal) e a serie audiovisual Sotaques.

Nos minutos finais falamos con Vítor Lourenço sobre a recuperación social e patrimonial do Casino 1889 de Carballo.

Proxecto Neo, 266.8: Kalee Rose Prendesgarst; Lola Tourón; J. M. Iglesias (Carballo Vivo)

En 2014 Kalee Rose Prendesgarst entrou na nosa terra e a nosa terra e a nosa cultura entraron na esencia de Kalee Rose, que mesmo pasou a ser Katuxa.

A paisaxe, a gastronomía, as festas, a lingua e a literatura na nazón de Breogán pasaron a estar presentes na súa vida diaria e neste momento participa en seráns e foliadas, toca a gaita e mesmo aprendeu o baile tradicional na escola provincial de danzas da Deputación de Ourense.

Na segunda entrevistas falamos con Lola Tourón Río, que naceu nunha data moi sinalada -un 25 de abril- en Carqueixeda, nas terras de Samos; estudou na Escola Superior de Arte e Deseño Ramón Falcón en Lugo; e dedícase ao artesanato como Mestra de Cestería.

No último terzo falamos de dinamización cultural e económica das terras de Friol. O interlocutor foi José Manuel Iglesias, da Asociación Carballo Vivo.

Proxecto Neo, 265.8: Carme Pais (Semente-Corunha); Marek Jacek Grzeszczyk; Paco Veiga

Neofalante nacida e residente na Coruña. Por libre vontade, cando tiña 15 anos, Carme Pais decidiu recuperar a lingua perdida. Conseguiuno. Neste programa coñecémola e falamos da Escola Semente, do grupo de comunicación virtual de neofalantes e tamén das familias que se xuntan nos parques coruñeses para conseguir que as súas crianzas se socialicen no idioma noso.

A historia de Marek Jacek Grzeszczyk é diferente. Este xeógrafo polaco chegou a Santiago de Compostela a través dun programa Erasmus para estudar na USC. Fixo un curso de lingua en Vigo e despois foise facendo fillo adoptivo da nosa terra. Agora anda por Euskadi.

Pola súa parte, o profesor Paco Veiga explicounos cales son os 14 puntos cos que a cidadanía de Riotorto e Meira argumenta diante da Academia Galega que o poeta Avelino Díaz sexa recoñecido co Día das Letras Galegas deste próximo ano.

Proxecto Neo, 264.8: Miguel Suárez (Eo-Navia); Miguel Anxo Varela; Lidia Pena

Miguel Suárez, de Boal, casou en Valencia. As súas amizades e parentes recibiron con alegría o convite, que rompeu moldes, porque foi escrito no idioma que o hoxe xornalista aprendeu na infancia. Para nós que mantivese con orgullo a súa identidade nun acto de tanta transcendencia resultounos moi chamativo e por iso quixemos falar con el. Mereceu moito a pena.

Con toda a enerxía positiva recollida na primeira entrevista, inmediatamente despois viaxamos a Ferrol para conversarmos con Miguel Anxo Varela, artista plástico. Con el falamos da música de María Manuela e Miguel -seus pais-, de Ferrol, das Belas Artes, de emigración e de retorno ás orixes. Foi outra colaboración co grupo de comunicación virtual O Mundo Fala Galego.

Nos minutos finais entramos en comunicación con Lidia Pena, a conta-contos que levou o seu obradoiro-espectáculo As Cores a Barcelona, con motivo da celebración do Día das Letras Galegas.

Aínda tivemos uns minutos para anunciar outra celebración: a Foliada convocada pola Fenda (Embaixada Cultural Galega) en Madrid.

Proxecto Neo, 263.8: Especial Paco Rivas

Paco Rivas é un escritor da Xeración dos '80 que comezou a publicar obra literaria no tránsito entre os séculos XX e XXI. Dado que naceu un día 17 de maio e dado tamén que acaba de publicar unha nova obra narrativa (O paraugas na raiola e outros relatos), decidimos dedicarlle un programa monográfico.

Primeiro fixemos unha aproximación biográfica e despois centrámonos nas súas obras de investigación sobre léxico mariñeiro. Seguidamente, centrámonos na súa produción literaria nos xéneros poético e narrativo, con especial destaque para Mar... Usía. Relatos salpresados (2018) e O paraugas na raiola e outros relatos (2019).

Proxecto Neo, 262.- Fran Bouso (Mondoñedo é Poesía); Ugia Pedreira (Comuna del Barruzo); Iria Moscoso (Foliada de Cervo)

O profesor Fran Bouso fíxonos crónica do encontro literario Mondoñedo é Poesía, integrado dentro do programa da festividade das Quendas. Ademais da festa dos maios, en homenaxe ao Pallarego, houbo recitais de escritores e escritoras novos e unha grande velada literaria no Auditorio Pascual Veiga coa participación de Martiño Maseda, Alberte Momán e Antón Reixa. Amenizaron con música Lino Rico e a Banda da Loba.

Ugia Pedreira presentounos un novo disco, feito en colaboración con Abel Mialma e Pierrot Rugier, con quen forma A Comunda del Barruzo. Coa súa axuda, coñecemos as particularidades da obra e escoitamos dúas cancións.

En representación da comisión organizadora da Foliada de Cervo, presentounos a Vª edición Iria Moscoso. Foi así como soubemos que teñen organizado un obradoiro de regueifas e outro de canto e pandeireta; que farán unha foliada; e que, despois de degustar carne de porco preparada de moi diferentes maneiras, chegará o prato forte coa actuación das Tanxugueiras.

Proxecto Neo, 261.8: Antonio Vidueiro; Santiago Barrios; Xosé María Leal Bóveda

Abrimos o programa cunha demorada conversa co profesor Antonio Vidueiro para falarmos de diferentes temáticas relacionadas coa educación. Ademais de nos comentar a súa experiencia en léxico e territorio, o entrevistado falounos do xogo popular dos bolos celtas.

Na segunda entrevista tivemos o pracer de conversar cun estudante de Filoloxía Románica na USC, Santiago Barrios, fillo de alsaciana e berciano e nacido en París. Un auténtico modelo de neofalante.

O terceiro entrevistado foi o profesor Xosé María Leal Bóveda, que nos presentou "O sistema defensivo litoral no Cantábrico galego", tema que coincide co título dun relatorio preparado a instancias das Asociacións Mariña Patrimonio e Pensamento e Sementeira de Viveiro.

Proxecto Neo, 260.8: Carlos Santiago (Volta e Dálle); IES Punta Candieira (Cedeira); Pilar Vázquez

O actor e dramaturgo Carlos Santiago, de familia picheleira 100% desde varias xeracións atrás, foi educado nunha lingua diferente daquela que recibiran os seus devanceiros. E, como é habitual na nosa terra, esa ruptura consolidouse nas diferentes escolas en que estudou. Casos excepcionais, como o do profesor Xabier Ferreiro, no Instituto Peleteiro, axudáronlle decisivamente a abrir a porta á recuperación do camiño inicialmente perdido. O protagonista desta evolución contra a corrente describiunos o proceso en nunha entrevista que mantivo con Alba Geada e Cristian Gómez.

Pola súa parte, a coordinadora da Biblioteca do IES Punta Candieira de Cedeira comentounos o acontecido a raíz dun obradoiro de poesía celebrado naquel centro educativo. Unha denuncia anónima provocou que a exposición dos poemas feitos polo alumnado fose censurada e retirada.

Pilar Vázquez, alumna do Ciclo Superior de Administración e Finanzas, tamén nos comentou o seu perfil sociolingüístico e fíxonos partícipes do proceso de rexeneración cultural que ela mesma está experimentando neste momento.

Proxecto Neo, 259.8: Fernando Redondo Neira; Miguelanxo Lar; Pepe Penabade

Fernando Redondo Neira, profesor na Faculdade de Ciencias da Comunicación da Universidade é o novo presidente da Fundación Neira Vilas. En Proxecto Neo quixemos transmitirlle os parabéns e quixemos coñecer cal é a súa idea de sobre o futuro da entidade que dirixe.

Con Miguelanxo Lar falamos da Fundación Novoneira e tamén do filme Soidi, da súa autoría, centrado na situación lingüística do Val de Xálima, en Extremadura.

Nos minutos finais, conversamos con Pepe Penabade, da compañía teatral Volta e Dálle, que está en xira co espectáculo que leva por título "Falar por falar".

Proxecto Neo, 258.8: Antón Lopo; Matías Nicieza; Lydia Botana

Continuamos facendo comunicación a través das ondas co apoio das redes sociais. Desta vez o primeiro tema tratado o Festival de Poesía "Alguén que respira", organizado pola Concellaría de Cultura de Santiago de Compostela. Tivemos un cronista excepcional: o escritor e xornalista, Antón Lopo, integrante da Comisión Organizadora.

A Masa Coral Modelo Burela quixo transmitir os parabéns a Matías Nicieza, gañador do certame de curtametraxes convocado no Valadouro. O director de "Instrucciones para empezar a hablar gallego" comentounos o argumento da obra e presentounos o elenco co que contou.

No último terzo do programa falamos coa artista Lydia Botana, que nos valorou o espectáculo didáctico "Palabras con corazón" que mantivo en escena durante unha semana no Palacio da Ópera da Coruña (un espectáculo a que tivemos o privilexio de asistir).

Proxecto Neo, 257.8: Lidia Pena; César Camoira Vega; Xabier Loureiro Duarte

"Alguén que respira" é o título do Encontro de Poesía organizado en Santiago de Compostela. Nós coñecemos a convocatoria grazas á atenta mensaxe que nos enviou Alexandre Fernández Peón, do comité organizador.

Das Mullerazas soubemos a través da intervención de Lidia Pena, da Semente de Trasancos. Agora estamos á espera do momento en que teñamos disponibilidade para ver este espectáculo teatral para crianzas de entre 3 e 9 anos.

No estudio de Radio Burela recibimos a visita do profesor César Camoira Vega, editor literario e asesor lingüístico.

No final deste espazo conversamos con Xabier Loureiro Duarte, estudante do Bacharelato de Artes no Instituto Politécnico de Vigo.

Proxecto Neo, 256.8: María G. Jartín; alumnado CICLO XESTIÓN ADMINISTRATIVA; Xosé Lastra Muruais (NOVA ESCOLA); VOLANDO BOYS

Recibimos a visita da profesora María G. Jartín, acompañada do alumnado do Ciclo Medio de Formación Profesional da área de Xestión Administrativa. A través das súas palabras, coñecemos os contidos do ciclo e as posíbeis saídas laborais.
O profesor Xosé Lastra Muruais presentounos as resolución da 35ª Asemblea de Nova Escola Galega. A entidade pedagóxica de referencia na nosa terra consensuou un relatorio sobre coeducación e outro sobre a situación da lingua. Na mesma reunión realizou o cambio na equipa directiva, agora presidida polo profesor Lastra.
Na parte final do programa falamos con Alejandra Alonso, que nos fixo crónica da participación da comparsa Volando Boys nos entroidos da Mariña, nos cales fixo divulgación do Camiño do Mar, que une Ribadeo e Teixido (na Serra Capelada).

Proxecto Neo, 255.8: Christian Salles; Lucía C. Pan; María Vázquez; Noé F. Quelle

Christian da Silva Salles. Brasileiro. Economista e historiador. No século XXI cruzou o Atlántico en viaxe virtual. Destino: a descoberta do berzo do seu propio idioma. No noso programa coñecemos as motivacións, coñecemos os resultados e démolos a coñecer á audiencia.

Con Lucía C. Pan e con María Vázquez falamos sobre Trote, a primeira longametraxe de Xacio Baño. Celebramos os Mestre Mateo e celebramos o Día Internacional da Muller Traballadora. E gozamos das historias contadas e filmadas desde aquí.

Proxecto Neo, 254.8: Juan Álvarez ("Os Sibailas"); Mark Wiersma; Anxo González Guerra (www.ogalego.eu)

Abrimos o programa cunha crónica de Juan Álvarez sobre o concerto de presentación dos Sibailas en Madrid. Falamos do ambiente do concerto, do repertorio e do futuro do grupo. Non esquecemos facer unha descrición do ambiente da foliada celebrada posteriormente ao concerto.

Co californiano Mark Wiersman comezamos a falar sobre o seu paso pola Universidade de Granada, a cidade en que estudou Teoría da Literatura e onde tamén estudou piano e guitarra flamenca. Despois recordamos a súa chegada a Santiago de Compostela, os seus traballos músico-editoriais, o ensino da música en dúas escolas, a colaboración co departamento de Literatura Comparada da USC e mesmo a súa intervención do LGx15.

Na última das entrevistas, Cristian Gómez falou co profesor Anxo González Guerra, integrante da primeira promoción que entrou na especialidade de Filoloxía Galego-Portuguesa en 1976.

Proxecto Neo, 253.8: Sonia Sancho; Oscar de Souto (Faros, Radio Roncudo); Juan Álvarez de Toledo (Sibailas)

Silvia Sancho Gómez (Pontevedra, 1990). Graduada en Belas Artes en Salamanca. Pasou 4 anos en Xapón cunha bolsa do Ministerio de Educación, Cultura, Ciencias e Deportes nipón para promocionar a Cultura Galega a través do Manga na Universidade Politécnica de Tokyo.

Actualmente vive en Vigo e profundiza na Cultura Galega para a dar coñecer a través doutros medios de expresión artística e incluíndo outras linguas.

Por motivos alleos á súa vontade, Silvia Sancho está de actualidade precisamente como consecuencia dunha consulta nun centro de saúde, onde coincidiu cun doutor con grave problema de alerxia... e de educación.

Na segunda parte do programa divulgamos a existencia de dous antídotos para superar os problemas de alerxias: a primeira medicación tróuxonola Oscar de Souto, director de Faros, o programa de poesía en Radio Roncudo; e da segunda responsabilizouse un galego-berciano, Juan Álvarez de Toledo, que nos presentou a primeiro concerto do grupo Sibailas, que fai música tradicional galega en Madrid.

Proxecto Neo, 252.8: Ana Pérez (TVG); Milagros Muíña

Quen #DefendeAGalega fai exactamente o que ten que facer. Por sentido da responsabilidade. Por iso nós quixemos falar con Ana Pérez, unha xornalista con máis de vinte anos de experiencia na Televisión de Galicia. Foi a nosa maneira de celebrar o Día Internacional da Radio. Ao mesmo tempo, coñecemos as reivindicacións dos #Venres negros.

Na segunda parte do programa puxémonos en contacto coa profesora Milagros Muíña, que nos atendeu desde Viveiro. A conversa comezou con temática medievalista e continuou cos cursos internacionais da Universidade de Santiago de Compostela, dos que a profesora convidada foi coordinadora.

Proxecto Neo, 251.8: Fernando G. Jácome (Sólo Voces); Teresa Rodríguez (Inclusión Educativa Modelo Burela); Xoana Veiga

No programa 251.8 coñecemos o Grupo Vocal Sólo Voces, a través das palabras do seu director Fernando Gómez Jácome.

Falamos da fundación da agrupación musical, do labor do Padre Castiñeira, das actuacións máis relevantes, do repertorio e mesmo tivemos a fortuna de que o Maestro Jácome nos fixese tres suxestións de grandes pezas da música culta galega.

Na segunda parte do programa falamos coa profesora Teresa Rodríguez, da área de Artes Plásticas. Ademais de coñecer as súas vivencias como estudante emigrada ao Canadá, falamos sobre o proceso de inclusión educativa que viviu como nai en Vigo a partir de 1994, o momento do retorno á nosa terra. Despois dunha breve pausa musical, abordamos a participación da profesora Rodríguez nas actividades de reforzo educativo ao alumnado inmigrante no IES Perdouro.

Antes da despedida do programa, aínda tivemos tempo para que Xoana Veiga nos presentase o concerto-presentación de "Dardos" na Casa das Crechas, en Santiago de Compostela.

Proxecto Neo, 250.8: Enma Pedreira Lombardía; Quique de Roxíos; Patricia Fidalgo (Cúrcuma); Manuel Miragaia; David Val

A escritora Enma Pedreira Lombardía abriu o programa facendo animación á lectura da súa nova obra Besta do seu sangue (premio Xerais, 2018).

Desde a cidade de Donosti, Quique de Roxíos falounos da súa participación no encontro literario Galeuska a celebrar en Oiartzun.

A gastrónoma Patricia Fidalgo (de Cúrcuma Tapas) presentounos a súa iniciativa hostaleira en Monte Alto (A Coruña). En conversa con Nuria Ramos Cuba, falounos dos pratos que elabora desde hai dez anos, especialmente daqueles que son os preferidos da súa clientela.

Na parte final do programa, presentamos dous libros. Manuel Miragaia animounos a ler Galeguía, obra centrada nas relacións históricas entre Galiza e Portugal; e as ideas do Galeguismo. Pola nosa parte, anunciamos a presentación en Burela de Un nómada en bicicleta. Pedaleando alrededor del mundo, de David Val Pena (Ed. Lar).

Proxecto Neo, 249.8: Adrián Canoura; Xosé Estévez; Alberto Calvín

Adrián Canoura falounos sobre o éxito das súas producións cinematográficas tanto no Estado español como en Francia, Portugal e o Brasil.

Pola súa parte o profesor Xosé Estévez, da Universidade de Deusto, falounos sobre os seus vínculos con Quiroga (onde naceu) e coa Fonsagrada (onde exerceu o sacerdocio). Tamén conversamos sobre o ambiente estudantil na universidade Complutense de Madrid na altura das revoltas surxidas a partir do mes de maio de 1968. O traballo docente na Universidade de Deusto, os ensaios sobre Manuel Murguía e o contido de conferencias sobre Galeuska e Plácido Castro completaron os temas abordados na entrevista.

No último cuarto deste espazo conversamos con Alberto Calvín, labrego e escritor de Taramundi.

Proxecto Neo, 248.8: Semente de Trasancos; CPI Virxe do Carme (Burela); Alicia Lago (Terzo da Fala)

Abrimos o programa con poesías recitadas por alumnas e alumnos do Colexio "Virxe do Carme" de Burela.

A seguir comunicamos con Ferrol, desde onde nos atendeu unha representante da Semente de Trasancos para nos dar a coñecer o estado da campaña "Vamos polo Primário", que vai conseguir o éxito.

Todo o resto do programa estivo dedicado á conversa coa profesora arxentino-galega Alicia Lago, que estivo no estudio de Radio Burela para compartir o programa coa equipa de Proxecto Neo.

Proxecto Neo, 247.8: Lucía Santiago Díaz (Revista Irimia); Pepe Vázquez Peinó

Lucía Santiago Díaz é a presidenta de Irimia, a Asociación de Crentes Galegos. Con ela celebramos os mil números dunha revista moi importante para a nosa cultura. 

Pepe Vázquez Peinó, lugués asentado na Mariña, é profesor no IES Alfoz-Valadouro. Nestes días presenta o seu libro de recente publicación. Titúlase "A fuxida" e é unha longa novela protagonizada por un adolescente que decide escapar na procura da súa identidade.