Proxecto Neo 471.15: Radio Saúde Burela - As relacións afectivo-sexuais

Como temos por costume, comezamos o programa cos espazos colaborativos: A Noticia do Día, a Pilula das ciencias, a Palabra do mes e A Micro Aberto con Antía Yáñez.

Inmediatamente despois entramos nunha nova entrega de Radio Saúde Burela, nesta ocasión dedicado as relacións afectivo-sexuais. 

A primeira das entrevistas foi con Sandra Dolores Fernández Otero, enfermeira especialista en enfermería familiar e comunitaria. Con ela conversamos sobre sexo e afectividade, sobre Infeccións de Transmisión Sexual e sobre a atención sanitaria a menores, entre outros temas. 

Inmediatamente a seguir falamos con Sara Chao de Diego, Facultativo Especialista de Área no Servizo de Xinecoloxía e Obstetricia do Hospital da Mariña, en Burela. Con ela falamos das funcións que desenvolve unha médica especialista en xinecoloxía, de anticoncepción, de educación sexual e doutros temas de interese.

Proxecto Neo 470.15: Especial mes da ciencia en galego co neurocirurxián Pedro Reimunde

Como temos por costume, comezamos o programa cos espazos colaborativos: A Noticia do Día, A Pílula das ciencias e a sección O corpo fala. Mais antes de entrar en materia, ao longo deste mes de novembro seguimos poñer os pelos de punta coa nosa sección de Audiorrelatos de medo do Samaín. Ouviamos os audiorelatos de Belanice e de Mauro. 

O programa 470 é un monográfico especial Mes da Ciencia en Galego. Entrevistamos ao neurocirurxián Pedro Reimunde, oriúndo de Alfoz. Traballa no HULA, o Hospital Universitario Lucus Augusti e imparte clase nas universidades da Coruña e de Santiago. Con el falamos do seu inmenso itinerario formativo, da súa actividade deportiva, do seu recente recoñecemento no Congreso Nacional Neuro-raquis e da práctica do exercicio físico como unha das opcións terapéuticas máis importantes no tratamento das doenzas da columna vertebral.

Proxecto Neo 469.15: Ana Dorrego Rivas & Hector Méndez Fernández

 

Como temos por costume, comezamos o programa cos espazos colaborativos: A Noticia do Día e A Pílula das ciencias. Mais antes de entrar en materia, ao longo deste mes de novembro seguimos poñéndovos os pelos de punta coa nosa sección de Audiorrelatos de medo do Samaín. Ouviamos os audiorelatos de Leonor e de Isaías. 

 

Co gallo do mes da Ciencia en galego, a primeira convidada desta tarde foi a doutora en neurociencias Ana Dorrego Rivas. Natural de Barreiros, hoxe reside en Londres. Con ela falamos do porqué da fuga de cerebros e da súa investigación en neurociencia. Detallounos o estudo que está coliderando sobre o desenvolvemento do noso cerebro e de como procesa os olores. 

 

Mais novembro é tamén o mes do 25N e entrevistamos Hector Méndez Fernández, psicólogo e Garda Civil da comandancia de Lugo e formador do Plan Director para a Convivencia e Mellora da Seguridade. El visítanos cada ano impartindo charlas de sensibilización de diversas temáticas. Hoxe tivémolo con nós para falar da situación actual da violencia contra a muller.

Proxecto Neo 468.15: Fran da Lobeira & Verónica Falcón Rielo

Como temos por costume, comezamos o programa cos espazos colaborativos: A Noticia do Día e A Pílula das ciencias. Mais antes de entrar en materia, ao longo deste mes de novembro imos poñer os pelos de punta coa nosa sección de Audiorrelatos de medo do Samaín. Ouviamos os audiorelatos de Manel e de Seynabou.

O primeiro convidado desta tarde foi Francisco Bermúdez Prieto, creador de contido en galego. É activista dixital e “community manager” amateur coñecido polas redes sociais como Fran da Lobeira. Lobeira é un topónimo da parroquia de Santa Mariña do Monte, no Concello de San Sadurniño na Coruña de onde é oriúndo. Confesa que foi falante de castelán até os 39 anos e hoxe explicaranos o porqué desta mudanza ao galego. Afincado en Madrid por traballo, militar de profesión, é suboficial especialista en SONAR no Estado Maior da Defensa. Mais Fran da Lobeira é un tipo ecléctico, polifacético, hiperactivo e xeneroso. Con el falamos dos seus comezos no mundo do cine como cineasta afeccionado co colectivo Chanfainalab, dos seus vídeos marabillosos na súa canle A Lobeira Today. Vimos como a través de YouTube reorientou a súa creatividade para publicar pequenos xogos audiovisuais nos que propón adiviñas culturais que teñen como elo común o coñecemento do galego. Tamén foi dos primeiros Instagramers en crear un vídeo diario en galego e na súa canle de YouTube deu visibilidade a máis de 240 canles na nosa lingua cada ano. En definitiva, Fran da Lobeira é o primeiro “streamer” en lingua galega en transmitir directos de máis de 1 día sen pausas na rede social Twitch e YouTube. Ademais é presidente da Asociación Cultural Obradoiro Dixital Galego que agrupa as tres grandes comunidades de creación dixital de contido en galego: Podgalego, Twitch en galego e YouTube en galego e que ten como principal obxectivo promover a divulgación e a normalización da lingua a través das novas tecnoloxías.

A nosa segunda convidada foi Verónica Falcón Rielo. Nada en Girona, de pais galegos e emigrantes polo territorio español. Véronica exerceu a súa profesión de docente en Valencia, Castela - A Mancha, Asturias e na actualidade en Galicia. Con ela falamos da vida na emigración, dos seus estudos, do bilinguïsmo dos sistemas educativos, da súa paixón deportiva e da súa práctica docente nas distintas comunidades polas que estivo e está exercendo.

Fran da Lobeira

Verónica Falcón Rielo

Proxecto Neo 467.15: Radio Saúde Burela - Adicción aos móbiles

 

Temos o primeiro programa especial Radio Saúde Burela desta temporada. 

Como temos por costume, comezamos o programa cos espazos colaborativos: A Noticia do Día, A Pílula das ciencias e O corpo fala, unha nova sección sobre hixiene postural. Finalmente, emitimos A Palabra do mes, unha colaboración mensual coa RAG.

Inmediatamente despois entramos nunha nova entrega de Radio Saúde Burela, nesta ocasión dedicado á nomofobia, o medo a estar sen o móbil.

Conversamos con Ainara Díaz Geada, enfermeira, doutora en Saúde Pública e Epidemioloxía pola Universidade de Santiago de Compostela, onde traballa como docente. As súas investigacións céntranse na influencia das desigualdades en saúde nos comportamentos de risco para a saúde das persoas mozas, como o consumo de alcol. Con ela falamos sobre o fenómeno da nomofobia, os problemas de saúde cos que se relaciona o uso intensivo dos móbiles e a súa asociación con outras condutas de risco. Ademais informaranos dos resultados do estudo SEGcohort do que é coordinadora. 

Tivemos tamén con nós a Maite Lanza Méndez, traballadora social da Unidade Asistencial de Drogodependencia de Burela. Tamén forma parte do grupo de traballo de Saúde Mental do Colexio de Traballo Social de Galicia, participa na Estratexia de Promoción da Saúde e Prevención e no Consello Local da Infancia do Concello de Burela. Con ela conversamos sobre as principais adiccións que detecta no seu traballo e sobre que condutas de risco constata a través dos ordenadores ou dos dispositivos móbiles.

Proxecto Neo 466.15: Mario Pillado Mon & Jairo Campo Vázquez

No programa 466.15 conversamos con Mario Pillado Mon, actual tenente de alcaldesa en Burela polo Bloque Nacionalista Galego e adestrador do filial e xuvenil feminino do Burela Fútbol Sala. Con el falamos dos seus inicios, do seu gusto pola política e do seu compromiso coa mocidade e coa inmigración, tarefas das que se ocupa desde a súa concellería. 

Inmediatamente a seguir tivemos a Jairo Campo Vázquez, profesor de Educación Física, segundo adestrador do Burela feminino de primeira división do Burela FS e actual director do CEIP Plurilingue Os Castros de Burela. Con el conversamos sobre educación e disciplina mais tamén sobre fútbol, a súa outra paixón. 

Proxecto Neo 465.15: aRi[t]mar; Irene Rega Jul; Laura Ramos Cuba ; Lucía Ferro

Especial Día das escritoras 

Abrimos o programa nº465 cos habituais espazos colaborativos do programa: A noticia do día e A pílula científica.

O pasado 13 de outubro celebramos o décimo aniversario do día das escritoras. O programa foi unha oportunidade para celebrar a creación literaria feminina. Por iso tamén contamos cun espazo dedicado á poesía feita por mulleres nas dúas beiras do Miño. A galega Silvia Penas e a portuguesa Sílvia Mota, dúas voces con estilos distintos, mais unidas por unha mesma linguaxe, a da palabra que transforma e conmove, recitan para Proxecto Neo os poemas cos que gañaron a última edición do certame aRi[t]mar. 

Ademais Proxecto Neo contou coa presenza de tres escritoras mariñás: Irene Rega Jul, de San Cibrao; Laura Ramos Cuba de Burela e Lucía Ferro, de San Miguel de Reinante (Barreiros), tres mulleres nadas na década dos 90.

Proxecto Neo 464.15: Elena Valle & Estela Villar

 

Abrimos o programa nº464 retomando os habituais espazos colaborativos do programa: A noticia do día e A pílula científica.

O pasado 30 de setembro celebramos o día da tradución, e desde Proxecto Neo, sumámonos ao recoñecemento dunha profesión esencial para construír pontes entre culturas e facilitar o diálogo. 

 

Na primeira entrevista conversamos con Elena Valle, ex-alumna do IES Perdouro de Burela que actualmente exerce de traductora, correctora e localizadora de videoxogos e que nos abriu a xanela a un sector creativo e en pleno auxe. Con ela recordamos os tempos en que participaba neste programa, da súa formación e do programa Doutoral en Tradución e Paratradución. Falounos da súa tese centrada en como a localización de videoxogos ao galego pode impulsar a normalización lingüística e de outros proxectos de interese. 

Inmediatamente a seguir tivemos por vía telefónica a Estela Villar, tradutora da editorial Rinoceronte. Con ela conversamos sobre o vixésimo aniversario da editorial e sobre o valioso labor que desenvolve no ámbito da tradución e da difusión literaria.

Proxecto Neo 463.15: María López Sández & Sofía Barreira

Hoxe traemos unha entrega moi especial, porque imos viaxar a través das palabras, das linguas e das súas pontes. A semana pasada celebramos o Día Europeo das Linguas e non queriamos deixar pasar a ocasión de reflexionar sobre a diversidade lingüística, a aprendizaxe e a mediación entre culturas. Para iso, contamos esta tarde con dúas convidadas de excepción: 

Na primeira entrevista conversamos con María López Sández, académica da Real Academia Galega. É filóloga e escritora e actualmente é profesora de Didáctica da Lingua e da Literatura da Universidade de Santiago de Compostela. Con ela falamos da paisaxe como construción cultural na literatura galega: como o espazo moldea a identidade e a narrativa. Preguntámoslle sobre o papel importante da Real Academia Galega en prol da normalización lingüística. 

Inmediatamente a seguir tivemos con nós a Sofía Barreira, unha neofalante de 16 anos que vive en Edimburgo, mais que medra co corazón en Lourenzá. Contounos a súa experiencia vital coa lingua galega e con outras linguas da súa contorna e explicounos como se desenvolve a vida dunha estudante nun instituto de Escocia.

Proxecto Neo 462.15: Daniel Irimia Gómez & Yoni Insua Cagigal

 

Neste primeiro programa da décima-quinta etapa de Proxecto Neo, contamos con dúas entrevistas. 

Na primeira conversamos con Daniel Irimia Gómez, profesor de Bioloxía no IES Perdouro este curso 25-26. Con el falamos de «Ser galego mola», un anuncio do Gadis co que saltou á fama e do seu triunfo como «tik toker» colgando vídeos curtos en galego na rede social.

Na segunda entrevista da tarde falamos do proxecto musical "A cova do can" e de rock con Yoni Insua Cagigal, profesor de formación profesional na rama de Administración.

Proxecto Neo 461.14 - Alfredo LLano; Oferta Educativa IES Perdouro 25-26

 

Como temos por costume, esta tarde comezamos o programa co habitual espazo colaborativo dirixido pola profesora Sonia Rei: A Noticia do Día. 

Na primeira entrevista conversamos con Alfredo Llano, compañeiro do Dpto de Electrónica e ex-alcalde de Burela. O motivo desta conversa con Alfredo Llano é a súa xubilación. Este foi o seu último ano lectivo como docente e como despedida facemos un repaso da súa traxectoria pola docencia e pola vida. 

Para finalizar o programa entrevistamos a 4 docentes da nosa escola para coñecermos a oferta de ciclos formativos no IES Perdouro. Javier Mogo conversa con María García Jartín, profesora do departamento de Administración, Ismael Castinheira, profesor en Eletrónica, Javier Rouco, profesor de Imagem Persoal e Manuel Basanta, docente nos ciclos de Mecanizado e Mecatrónica.